હવેવરસાદની મોસમ શરૂ થઈ હોવાથી ભરણી કરવું લગભગ સંભવ જણાતું નથી ત્યારે આ ખોદાણને કોર્ડન કરી તે તરફ કોઈ વાહન કે રાહદારી નહીં આવે તેવી વ્યવસ્થા કરવા બુલંદ બનેલી માંગણી
(વર્તમાન પ્રવાહ ન્યુઝ નેટવર્ક)
તસવીર-અહેવાલ : રાહુલ ધોડી દમણ, તા.27
મોટી દમણના મગરવાડા 6 રસ્તાથી ભામટી તળાવ ફળિયાના મુખ્ય માર્ગ ઉપર રોડના વિસ્તૃતિકરણ માટે કરેલા ખોદકામની ભરણી નહીં થતાં ચોમાસામાં જાનલેવા અકસ્માત સર્જાવાની ભીતિ પેદા થઈ છે.
પ્રાપ્ત માહિતી પ્રમાણે મગરવાડા છ રસ્તાથી ભામટી તળાવ ફળિયાના મુખ્ય માર્ગ ઉપર ભીમ તળાવને અડી રસ્તાના વિસ્તૃતિકરણ માટે કરેલા ખોદાણની ભરણી નહીં થતાં વરસાદ દરમિયાન પાણી ભરાવાના કારણે રોડ અને ખોદાણ વાહનચાલકો તથા રાહદારીઓને નજરે નહીં પડશે. આ રસ્તા ઉપર સ્ટ્રીટ લાઈટ પણ નથી. જેના કારણે અગામી દિવસોમાં વરસાદના સમયે આ રસ્તા ઉપરથી જાનના જોખમે પસાર થવું પડે એવી સ્થિતિ પેદા થઈ છે.
અત્રે નોંધનીય છે કે, હવે વરસાદની મોસમ શરૂ થઈ હોવાથી ભરણી કરવું લગભગ સંભવ જણાતું નથી. ત્યારે આ ખોદાણને કોર્ડન કરી તે તરફ કોઈ વાહન કે રાહદારી નહીં આવે તેવી વ્યવસ્થા કરવી જોઈએ એવી આમલાગણી પ્રવર્તી રહી છે.
