(વર્તમાન પ્રવાહ ન્યુઝ નેટવર્ક) સેલવાસ, તા.13
સંઘપ્રદેશ દાદરા નગર હવેલીમાં આજે આખો દિવસ અનરાધાર વરસાદ ચાલુ રહ્યો હતો જેમાં પાંચ ઇંચથી વધુ વરસાદ પડયો હતો. સાંબેલાધાર વરસાદના કારણે સેલવાસના ફ્રુટ ગલી, બ્રહ્મદેવ મંદિર પાસે અને નક્ષત્ર વન સહિત વિવિધ વિસ્તારોમાં પાણી ભરાવાની સમસ્યાએ દેખા દીધી હતી. સેલવાસમાં 133 એમએમ પાંચ ઇંચથી વધુ વરસાદ પડયો હતો જ્યારે સિઝનનો કુલ વરસાદ 1241.4 એમએમ એટલે કે 49.64 ઇંચ વરસાદ થયો છે. મધુબન ડેમનું લેવલ 70.50 મીટર અને ડેમમાં પાણીની આવક 86353 ક્યુસેક નોંધાઈ છે. જ્યારે પાણીની જાવક 82890 ક્યુસેક હોવાનું તંત્ર દ્વારા જાણવા મળ્યું હતું. ઉપરવાસમાં ભારે વરસાદને કારણે મધુબન ડેમમાંથી વધુ પાણી છોડવામાં આવશે જેના કારણે પ્રશાસન દ્વારા નદી કિનારાના ગામોના લોકોને સાવચેત રહેવા તાકીદ કરાઈ છે.
ભારે વરસાદ, પાણી ભરાઈ જવા અને અન્ય કોઈ ગંભીર પૂર જેવી ઘટના અંગે કોઈપણ અપડેટ, માહિતી, ફરિયાદ અથવા ફરિયાદ માટે, જનતા કંટ્રોલ રૂમ નંબર 1077, 0260-2412500, 87800 01077 પર સંપર્ક કરવા તંત્ર દ્વારા જણાવાયું છે.
હવામાન વિભાગ દ્વારા જારી કરવામાં આવેલી હવામાનનીઆગાહીને ધ્યાનમાં રાખીને, નાગરિકોને ચેતવણી આપવામાં આવે છે કે તેઓ સતર્ક રહે અને ઘરની અંદર રહે, નદી વિસ્તારની નજીક જવાનું ટાળે, સુરક્ષિત રહે અને વિભાગ દ્વારા સમયાંતરે જારી કરવામાં આવેલી ચેતવણીઓ અને ચેતવણીઓનું પાલન કરે.