ચીખલી આસપાસ હાઈવે ઉપર બે થી ત્રણ ફૂટ પાણી ફરી વળતા લેવાયેલો નિર્ણય પાણી ઓસરતા હાઈવે કાર્યરત થશે
(વર્તમાન પ્રવાહ વાપી બ્યુરો)
વાપી, તા.14: વલસાડ જિલ્લામાં છેલ્લા છ દિવસથી સાંબેલાધાર વરસાદ તમામ વિસ્તારોમાં પડી રહ્યો છે. નોનસ્ટોપ પડી રહેલા વરસાદે અનેક પ્રકારની ખાના ખરાબી તારાજી ઠેર ઠેર સર્જી છે. તેમાં નેશનલ હાઈવે પણ બાકાત નથી. આજે ગુરુવારે વહેલી સવારથી વલસાડથી લઈ ચીખલી સુધી ભયંકર અતિવૃષ્ટિ થઈ હતી. જેને કારણે નેશનલ હાઈવે ઉપર બે થી ત્રણ ફૂટ પાણી ખાસ કરીને ચીખલી હાઈવે ઉપર ભરાઈ જતા હાઈવેની અવરજવર અટકાવી દીધી હતી તેથી વાપીથી લઈ ચીખલી સુધીનો હાઈવે બંધ થતા ઠેર ઠેર વાહનોની કતારો લાગી ગઈ હતી. ચીખલીમાંથી પસાર થતા નેશનલ હાઇવે પર ચીમલા ફાટક આગળ બલવાડા પાસે કાવેરી નદીના પુરના પાણી પસરી જતા નેશનલ હાઇવે પરનો વાહન વ્યવહાર પણ થંભી જતા બન્ને તરફ ટ્રાફિક જામ સાથે વાહનોની લાંબી કતાર થઈજવા પામી હતી. ચીખલીમાં હાઇવેના સર્વિસ રોડ પર પણ ઠેર-ઠેર પાણી ભરાયા હતા.
દક્ષિણ ગુજરાતમાં છેલ્લા છ દિવસથી વરસી રહેલ બેફામ વરસાદે સ્કોર 60 ઈંચ સુધીનો નોંધાવી દીધો છે. એક જ સપ્તાહમાં વલસાડ જિલ્લામાં આકાશ ફાટયુ હોય તેમ ધનાધન નોન સ્ટોપ વરસાદ તમામ તાલુકાઓમાં વરસી રહ્યો છે. જેને લઈ શહેરી-ગ્રામ્ય વિસ્તારમાં તો તારાજી સર્જાઈ ચૂકી છે. પરંતુ આજે નેશનલ હાઈવે પણ અતિવૃષ્ટિનો ભોગ બન્યો હતો. ચીખલી આસપાસ હાઈવે ઉપર બે થી ત્રણ ફૂટના પાણી ફરી વળતા સત્તાવાળાઓએ હાઈવે બપોરે બંધ કરી દેવાયો હતો. અલબત્ત પાણી ઓસર્યા બાદ હાઈવે રાબેતા મુજબ ચાલુ થઈ જશે પરંતુ હજારો વાહનોના પૈંડા વાપીથી ચીખલી સુધી થંભી ગયા હતા. બન્ને લાઈન ઉપર કતારો લાગી ગઈ હતી.