જિ.પં. સભ્યપદેથી પણ રાજીનામું: મોટી કોરવડ બેઠક ઉપર ભાજપથી વિજયી બન્યા હતા
(વર્તમાન પ્રવાહ વાપી બ્યુરો)
વાપી, તા.18: વલસાડ જિલ્લા ભાજપમાં આજે સોમવારે રાજકીય ભુકંપ સર્જાયો હતો. જિલ્લા પંચાયત શિક્ષણ સમિતિ અધ્યક્ષ નિર્મળાબેન જાદવે રાજીનામું આપ્યું હતું. તેમજ જિ.પં.ના સભ્યપદેથી પણ રાજીનામું આપતા ભાજપમાં હાઈવોલ્ટેજ ડ્રામા સર્જાયો હતો. રાજીનામાનું કારણ તેમણે દર્શાવ્યું હતું કે પોતાના મતવિસ્તાર પાર-તાપી રિવર લીંક પ્રોજેક્ટનો સખત વિરોધ છે. હું શાસકપક્ષમાં હોવાથી પ્રજાના જવાબ આપી શકતી નહોતી, પ્રજા સાથે રહેવા માગું છું.
જિલ્લાની મોટી કોરવડ બેઠક ઉપર જિલ્લા પંચાયતના સભ્ય તરીકે ભાજપની ટિકિટ ઉપર ચૂંટણીમાં નિર્મળાબેન જાદવ વિજેતા બન્યા હતા. જિ.પં.માં ભાજપની સ્પષ્ટ બહુમતિ મળેલી તેથી નિર્મળાબેનને જિ.પં. શિક્ષણ સમિતિના અધ્યક્ષ તરીકે વરણી કરાઈ હતી. આજે સવારથી જ નિર્મળાબેન રાજીનામું આપવાની વાત વહેતી થતા જિ.પં.માં ભાજપના કાર્યકરોમાં હાઈવોલ્ટેજ છવાયો હતો. પરંતુ તેઓ જિ.પં.માં આવેલા નહીં. સોશિયલ મીડિયાથી જિલ્લા વિકાસ અધિકારીને રાજીનામું મોકલી આપ્યું હતું. કારણ દર્શાવ્યું હતું કે, હું મારા મત વિસ્તારમાં ચાલી રહેલ પાર-તાપી રિવર લીંક આંદોલનમાં પ્રજાની સાથે રહેવા માંગુ છું. નિર્મળાબેનના રાજીનામાને લઈ ભાજપમાં હાઈવોલ્ટેજ ડ્રામા સર્જાયો હતો.
