નરોલી ગ્રામ પંચાયત સહિત વિવિધ આદિવાસી વિસ્તારોમાં પારંપારિક વાદ્યો તારપા, તૂર, ઢોલ-શરણાઈના સૂરે નાચ ગાનની સાથે રાષ્ટ્રપતિ બનેલા દ્રૌપદી મુર્મુના વિજયને વધાવવામાં આવ્યો
(વર્તમાન પ્રવાહ ન્યુઝ નેટવર્ક)
દમણ, તા.21: દેશના પ્રથમ આદિવાસી રાષ્ટ્રપતિ તરીકે શ્રીમતી દ્રૌપદી મુર્મુ ચૂંટાઈ આવતાં સમસ્ત દાદરા નગર હવેલી અને દમણ-દીવમાં આનંદ-ઉત્સવનો માહોલ સર્જાયો હતો. દાદરા નગર હવેલીના વિવિધ આદિવાસી વિસ્તારો પારંપારિક વાદ્ય તારપા, તૂર, ઢોલ-શરણાઈના સૂરથીગુંજી ઉઠયા હતા.
નરોલી ખાતે પંચાયત દ્વારા શ્રીમતી દ્રૌપદી મુર્મુના વિજયને વધાવવાનો ખાસ કાર્યક્રમ રાખવામાં આવ્યો હતો. જ્યાં સ્થાનિક આદિવાસીઓએ પારંપારિક નૃત્ય કરી પ્રથમ આદિવાસી રાષ્ટ્રપતિ બનેલા શ્રીમતી દ્રૌપદી મુર્મુને અભિનંદન આપવામાં આવ્યા હતા.
દમણ ખાતે ભાજપ કાર્યાલયમાં ફટાકડા ફોડી મિઠાઈ વહેંચી વિવિધ મોર્ચાના પદાધિકારીઓએ આનંદ-ઉત્સવ મનાવ્યો હતો.