સંઘપ્રદેશ ભાજપના મોટાભાગના હોદ્દેદારો પક્ષનો જનાધાર વધારવાની જગ્યાએ પોતાની પ્રસિદ્ધિનો રાખતા આગ્રહ
(વર્તમાન પ્રવાહ ન્યુઝ નેટવર્ક)
સેલવાસ, તા.10: સેલવાસ નગરપાલિકાના ઉપ પ્રમુખ અને સેલવાસ જિલ્લા ભાજપ પ્રમુખ શ્રી અજયભાઈ દેસાઈએ એક પત્રકારને ટેલીફોન ઉપર આપેલી ધમકી ટોક ઓફ ધ ટાઉન બની છે.
પ્રાપ્ત માહિતી પ્રમાણે એક ખબરના પ્રસારણ દરમિયાન સેલવાસના પત્રકારે પોતાની યુ ટયુબ ચેનલમાં એક કાર્યક્રમમાં ઉપસ્થિત રહેલા સેલવાસ નગરપાલિકાના ઉપ પ્રમુખ અને જિલ્લા ભાજપ પ્રમુખ શ્રી અજયભાઈ દેસાઈનું નામ નહીં લેતાં અજયભાઈ દેસાઈએ ઉક્ત પત્રકારને ટેલીફોન ઉપર અપમાન કરી ધમકી આપી હતી.
અત્રે નોંધનીય છે કે, દાદરા નગર હવેલી અનેદમણ-દીવમાં મોટાભાગના ભાજપના પદાધિકારીઓ પક્ષનો જનાધાર વધારવાની જગ્યાએ પોતાની સ્વયં પ્રસિદ્ધિમાં વધુ રસ લઈ રહ્યા છે. જેના ફળસ્વરૂપે જ શ્રી અજયભાઈ દેસાઈના નામનો ઉલ્લેખ નહીં કરતા પત્રકારને ધમકી આપવાની ઘટના બની હતી.
આ સંદર્ભમાં વર્તમાન પ્રવાહે સેલવાસ નગરપાલિકાના ઉપ પ્રમુખ શ્રી અજયભાઈ દેસાઈનો સંપર્ક કરવા તેમના મોબાઈલ ઉપર પ્રયાસ કર્યો હતો અને તેમના ફોનની ઘંટડી વાગવા છતાં તેમણે કોઈ પ્રત્યુત્તર નહીં આપતાં તેમનો પક્ષ રજૂ કરી શકાયો નથી.