ફાયર બ્રિગેડે ગાયને સુરક્ષિત બહાર કાઢવા ચારે તરફ જમીન ખોદી ગાયનું રેસ્ક્યૂ કર્યું
(વર્તમાન પ્રવાહ વાપી બ્યુરો)
વાપી, તા.11: વાપી જીઆઈડીસી હરીયા હોસ્પિટલ રોડ નજીક રમઝાનવાડીમાં આવેલ ખુલ્લી ગટરમાં છ ફૂટ નીચે ગાય ખાબકી હતી. લોકોને જાણ થતા ફાયર બ્રિગેડને જાણ કરી હતી. ત્રણથી ચાર કલાકની ભારે જહેમત બાદ ગાયને સુરક્ષિત રીતે બહાર કઢાઈ હતી.
વાપી હરીયા હોસ્પિટલ રોડ ઉપર આવેલ રમઝાડવાડી પાસે આવેલ ગટરના ઢાંકણા કોઈ ચોર ઈસમો ચોરી જતા ગટર ખુલ્લી પડી હતી. ગતરોજ ચરતા ચરતા ખુલ્લી ગટરમાં ગાય છ ફૂટ નીચે ખાબકી ગઈ હતી. ઘટનાની જાણ થતા ફાયર બ્રિગેડએ ગાય બહાર કાઢવા રેસ્ક્યુ શરૂ કર્યું હતું. પરંતુ સુરક્ષિત રીતે ગાય બહાર નિકળી શકે એમ નહી હોવાથી ખાડા આજુબાજુ ખોદકામ કરીને રસ્તો બનાવ્યો હતો. ત્રણ-ચાર કલાકની જહેમત બાદ અંતે સુરક્ષિત રીતે ગાયને બહાર કઢાઈ હતી. ખુલ્લી ગટરોમાં ક્યારેક બાળકો કે કોઈ પણ આમ આદમી પણ ગરકાવ થઈ શકે એમ છે તેથી જવાબદાર એજન્સીએ તાકીદે ખુલ્લી ગટર મરામત કરાવવી રહી.તેવી લોકોની માંગ છે.