કોંગ્રેસ કાર્યકરો સાથે ધારાસભ્ય અનંત પટેલએ શરૂ કરેલો ખાડા મહોત્સવ : ધારાસભ્ય સહિત કાર્યકરોની ધરપકડ
(વર્તમાન પ્રવાહ વાપી બ્યુરો)
વાપી, તા.18: વાપીથી શામળાજી જતો નેશનલ હાઈવે 56 ઉપર પડેલા ખાડાઓ વિરૂધ્ધ આજે વાંસદાના ધારાસભ્ય અને કોંગ્રેસ કાર્યકરોએ ખાડા મહોત્સવનો પ્રારંભ કરીને સૌ કાર્યકરો ખાડામાં બેસી જઈ જન આંદોલનના શ્રી ગણેશ કર્યા હતા.
વાપી-શામળાજી નેશનલ હાઈવે વાપીથી વાંસદા-વઘઈ, ધરમપુર, નાનાપોંઢા વચ્ચે પસાર થતો હાઈવે ચોમાસામાં તૂટી ચૂક્યો છે. હાઈવે ઉપર પડેલા ખાડા જાહેર બાંધકામ વિભાગ નજર અંદાજ કરી રહેલ છે ત્યારે વાંસદાના ધારાસભ્ય અનંત પટેલએ આજથી ખાડા મહોત્સવ ઉજવવાનું એલાન કર્યું છે. ઠેર ઠેર ખાડાઓની પૂજા કરાશે. વાસણો ધોવામાં આવશે. ખાડાઓનું જતન કરવાનો તાર્કિક સંદેશા સાથે જનઆંદોલનનો પ્રારંભ કર્યો હતો. રોજ રોજ હાઈવેના ખાડા માટે જુદા જુદા કાર્યક્રમો આપીને જોરદાર વિરોધ કરવામાં આવશે. આજે ખાડા આંદોલનના પ્રારંભ સાથે ખાડાઓ ઉપર કાર્યકરો બેસી ગયા બાદ ખાડાની પૂજા કરી રહ્યા હતા તેથી ટ્રાફિક જામ થઈ ગયો હતો. પોલીસ ઘટના સ્થળે દોડી ગઈ હતી અને ધારાસભ્ય સાથે તમામની ધરપકડ કરી હતી. વિરોધપક્ષનાનેતા હસમુખ પટેલ તા.કોંગ્રેસ પ્રમુખ નિકુંજભાઈ, ઉનાઈ સરપંચ મનીષ પટેલ, ચંપાબેન સહિતના કાર્યકરો ખાડા મહોત્સવમાં જોડાયા હતા તેમજ ધારાસભ્ય સાથે ખાડાઓમાં બેસી ગયા હતા.
