ટી.સી. મુક્તારભાઈ કાજીએ ફર્સ્ટ ક્લાસમાં ટિકિટ વગર મુસાફરી કરી રહેલ રવિ અને રોહીત વિરૂધ્ધ જી.આર.પી. વલસાડમાંનોંધાવેલી ફરિયાદ
(વર્તમાન પ્રવાહ વાપી બ્યુરો)
વાપી, તા.07: રેલવેમાં ટિકિટ વગર મુસાફરી કરવી ગુનો છે છતાંય માથાભારે મુસાફરો ટિકિટ વગર મુસાફરી કરતા હોય છે. કંઈક તેવી જ ઘટના ભીલાડ-બરોડા મેમુ ટ્રેનમાં ગતરોજ ઘટી હતી. ડુંગરી નજીક ફસ્ટક્લાસ કોચમાં મુસાફરી કરી રહેલ બે ભાઈઓ પાસે ચેકીંગ દરમિયાન ટી.સી.એ ટિકિટ માંગી હતી. ટિકિટ નહી બતાવતા દંડ કરવાનું જણાવતા બે ભાઈઓએ ટી.સી. ઉપર હુમલો કરી રોકડ તથા મોબાઈલ ઝૂટવી લેતા ટી.સી.એ વલસાડ રેલવે પોલીસમાં ફરિયાદ નોંધાવી હતી.
પ્રાપ્ત વિગતો મુજબ ભિલાડ-બરોડા મેમુ ટ્રેનમાં ટી.સી. મુક્તારભાઈ મોહંમદ કાજી રાબેતા મુજબ ડુંગરી સ્ટેશને ટ્રેનમાં ફસ્ટ ક્લાસ કોચમાં ટિકિટ ચેકીંગ કરવા ચઢયા હતા. કોચમાં મુસાફરી કરી રહેલ રવિ સરોજકુમાર અને રોહીત સરોજકુમાર નામના બે ભાઈઓ પાસે ટી.સી.એ ટિકિટ માંગી હતી. જે રજૂ નહી કરતા ટી.સી.એ દંડ ભરવાનું જણાવેલું. તેથી ઉશ્કેરાઈને બન્ને ભાઈઓએ ટી.સી. ઉપર હુમલો કરી રોકડા 760 અને મોબાઈલ ઝૂંટવી લીધો હતો. બન્ને ભાઈઓ બિલીમોરા પહેલા નીચે ઉતરી ફરાર થઈ ગયા હતા તેથી ટી.સી. મુક્તારભાઈએ વલસાડ જી.આર.પી.માં બન્ને વિરૂધ્ધ ફરિયાદ નોંધાવી હતી.
