(વર્તમાન પ્રવાહ ન્યુઝ નેટવર્ક)
સેલવાસ,તા.11: દાદરા નગર હવેલીમાં વાદળોના ગડગડાટ અને વિજળીના ચમકારા સાથે અને પવન સાથે ભારે વરસાદ ખાબકવાના પડવાને કારણે કેટલાક ગામોમાં વૃક્ષો તૂટી પડતા મુખ્ય રસ્તાઓ બંધ થઈ જવા પામ્યા હતા. જ્યારે કેટલીક જગ્યાઓ પર વૃક્ષો પડવાને કારણે વીજપોલને ભારે નુકસાન થતાં વીજળી પણ ગુલ થતાં લોકોને અંધારપટ્ટનો સામનો કરવા પડયો હતો.
સુરંગી ગામે એક જગ્યા પર આંબાનું મોટું ઝાડ પડી જતાં રસ્તો બંધ થઈ ગયો હતો જેને ફાયર વિભાગ અને ડિઝાસ્ટર વિભાગ દ્વારા હટાવી રસ્તો ખુલ્લો કરવામાં આવ્યો હતો. જ્યારે સુરંગી આઉટપોસ્ટ નજીક નિલગીરીનું ઝાડ પડવાને કારણે આગળના ભાગે નુકસાન થયું હતું. સુરંગી, આંબોલી અને વાસોણા ગામમાં પણ વૃક્ષો તુટી પડયા હતા. જેને હટાવવાની કામગીરી પ્રશાસન દ્વારા હાથ ધરી હતી પરંતુ એના કારણે કેટલાક વીજપોલ તુટી જવાને કારણે કેટલાક ગામોમાં વીજળી પણ ગુલ થઈ ગઈ હતી.
સેલવાસમાં 22.6 એમએમ એટલે એક ઇંચ વરસાદ વરસ્યો હતો. સિઝનનો કુલ વરસાદ2936.4 એમએમ એટલે કે 117.44 ઇંચ વરસાદ થયો છે. જ્યારે ખાનવેલમા 42.5 એમએમ એટલે કે દોઢ ઇંચથી વધુ અને સિઝનનો કુલ વરસાદ 2806.2 એમએમ એટલે કે 110.48 ઇંચ વરસાદ થયો છે. મધુબનડેમનું લેવલ 78.40 મીટર છે. મધુબન ડેમમાં પાણીની આવક 10507 ક્યુસેક છે અને ડેમમાં પાણીની જાવક 11582 ક્યુસેક નોંધાઈ છે.
