-
ઈલેક્ટ્રીક લાઈનની સર્વિસનું કામ કરી રહેલા મુકેશ માહદુ વાઘનું અકાળે અવસાન થતાં ગામલોકોમાં ફેલાયેલો આક્રોશ
-
સરપંચ સહિત આગેવાનોએ ટોરેન્ટ પાવરના અધિકારી-એન્જિનિયરોની લીધેલી ખબરઃ પોતાની જવાબદારીમાંથી છટકવા ટોરેન્ટ પાવરે શરૂ કરેલી બહાનાબાજી
(વર્તમાન પ્રવાહ ન્યુઝ નેટવર્ક)
સેલવાસ, તા.13 : સંઘપ્રદેશ દાદરા નગર હવેલીના કૌંચા પંચાયત વિસ્તારમાં આવેલ બિલધરી પટેલ પાડા ખાતે આજે ઈલેક્ટ્રીકના થાંભલા ઉપર કામ કરતા ટેક્નીકલ હેલ્પર મુકેશ વાઘનું શોક લાગવાથી નિધન થતાં ટોરેન્ટ પાવરની અક્ષમ્ય ઉદાસિનતા છતી થવા પામી છે.
પ્રાપ્ત માહિતી પ્રમાણે દાનહના કૌંચા પંચાયત ખાતે બિલધરી પટેલ પાડામાં એક ઈલેક્ટ્રીકના થાંભલા ઉપર ઈલેક્ટ્રીકલ કોન્ટ્રાક્ટર રોઝી ઈલેક્ટ્રીકલ્સ દ્વારા ટોરેન્ટ પાવર વતી ઈલેક્ટ્રીક લાઈનની સર્વિસનું કામ કરવામાં આવી રહ્યું હતું. જેમાં મુકેશ માહદુ વાઘ (ઉ.વ.26) રહે. ગાઢવી ટમ્બલમલ (ગુજરાત) ટેક્નીકલ હેલ્પર તરીકે કામ કરતો હતો. પરંતુ ઈલેક્ટ્રીક પોલ ઉપર કામ કરતા સમયે અચાનક શોક લાગતાં ઘટના સ્થળે જ મોત થવા પામ્યું હતું.
આઘટનાની ખબર પડતાં જ તાત્કાલિક બીજા વાયરમેન દોડી આવ્યા હતા અને તેમણે નજીકની લાઈન બંધ કરી મુકેશની બોડીને નીચે ઉતારી હતી. આ ઘટનાની ખબર મળતાં જ ટોરેન્ટ પાવરના એન્જિનિયરો અને અધિકારીઓ દોડતાં થયા હતા. ગામના સરપંચ અને આગેવાનોએ પૂછપરછ કરતાં તેઓએ ગલ્લાતલ્લાં કરવાનું શરૂ કર્યું હતું. ટોરેન્ટ પાવરે પોતાની જવાબદારીમાંથી છટકવા બહાનાબાજી શરૂ કરી હોવાની ચર્ચા પણ ગામમાં થઈ રહી છે.
આ બાબતે ઘટના સ્થળે પોલીસની ટીમ પહોંચી લાશનો કબ્જો લઈ પી.એમ. માટે ખાનવેલ સબ જિલ્લા હોસ્પિટલમાં રવાના કરાઈ હતી. ખાનવેલ પોલીસે ફરિયાદ નોંધી ઘટના અંગે ખરેખર કોણ જવાબદાર છે તેની તપાસ હાથ ધરી હોવાની માહિતી સાંપડી છે.