(વર્તમાન પ્રવાહ ન્યુઝ નેટવર્ક)
દમણ, તા.19 : દમણ પોલીસે એક મહિના પહેલાં નાની દમણના સોમનાથ દાભેલ ખાતે એક મોબાઈલની દુકાનમાંથી ચોરી થયેલ મોબાઈલ અને એસેસરીઝની ઘટનાનો ભેદ ઉકેલી અલગ અલગ કંપનીના 33 મોબાઈલ અને 4 મોબાઈલ એસેસરીઝ અને હોન્ડા ડીઓ મોપેડ સાથે એક આરોપીની ધરપકડ કરવા સફળતા મેળવી છે.
પ્રાપ્ત માહિતી પ્રમાણે ગત તા.20મી સપ્ટેમ્બરના રોજ ફરિયાદી જતિનકુમાર નરેશભાઈ વેદાંતની નાની દમણના સોમનાથ દાભેલ ખાતે સેન્ટર પોઈન્ટમાં રાઈટ ચોઈસ ટેલીકોમ નામે આવેલ મોબાઈલની દુકાનમાં રાત્રિના સમયે દુકાનનું પાછળનું શટર તોડી અંદર પ્રવેશી અલગ અલગ કંપનીના 34 મોબાઈલ અને 8 એસેસરીઝ જેની અંદાજીત કિંમત 4 લાખ 70 હજારની થયેલ ચોરીની ફરિયાદ પોલીસ દફતરે નોંધવામાં આવીહતી.
દમણ પોલીસે ગુનાની તપાસ માટે અલગ અલગ ટીમનું ગઠન કરી સંગઠિત રૂપથી પોતાની તપાસ ચાલુ રાખી હતી જેમાં આજુબાજુ વિસ્તારના સીસીટીવી કેમેરાના ફૂટેજ, બાતમી અને હ્યુમન ઈન્ટેલિજન્સ તથા ટેક્નીકલ સાધનોની મદદથી નાની દમણના દાભેલ ખાતે આંટિયાવાડ ચાર રસ્તા નજીક રહેતા આમીર હકીક કુરેશી (ઉ.વ.18)ની ધરપકડ કરી પૂછપરછ કરતા તેને પોતાનો ગુનો કબુલી લીધો હતો અને તેની પાસેથી મોબાઈલની દુકાનમાંથી ચોરી કરાયેલા અલગ અલગ કંપનીના 33 મોબાઈલ, અલગ અલગ કંપનીની 4 મોબાઈલ એસેસરીઝ તથા 1 હોન્ડા ડીઓ મોપેડ કબ્જે કરવા દમણ પોલીસને સફળતા મળી છે.
આરોપીને અદાલતમાં રજૂ કરતાં દમણની કોર્ટે 20મી ઓક્ટોબર સુધી પોલીસ કસ્ટડી મંજૂર કરેલ છે.
