ડીએમસીના કાઉન્સિલર મુકેશ પટેલે જલારામ બાપાની આરતી ઉતારી લીધેલા આશીર્વાદ
(વર્તમાન પ્રવાહ ન્યુઝ નેટવર્ક)
લંડન, તા.01 : સંત શિરોમણી શ્રી જલારામ બાપાની 223મી જન્મ જયંતિ નિમિત્તે દેશભરમાં ઉજવણીની સાથે ભારતથી સાત સમંદર પાર યુનાઈટેડ કિંગડમના લેસ્ટર શહેરમાં વસતા દમણવાસીઓના જય જલારામ યુવક મંડળ દ્વારા જલારામ બાપાની જન્મ જયંતિની ખુબજ ધામધૂમથી ઉજવણી કરવામાં આવી હતી. આ પાવન અવસરે વિધિ-વિધાન સાથે જલારામ બાપાની પૂજા-અર્ચના કરવામાં આવી હતી. દમણથી યુ.કે.ના પ્રવાસે ગયેલા દમણ નગરપાલિકાના પૂર્વ પ્રમુખ અને વર્તમાન કાઉન્સિલર શ્રી મુકેશ પટેલે જલારામ બાપાની આરતી ઉતારી આશીર્વાદ મેળવ્યા હતા. સાથે જ શ્રી મુકેશ પટેલે યુ.કે.માં વસતા તમામ ભારતીયો માટે અને સંઘપ્રદેશવાસીઓની સુખ-શાંતિ અને સમૃદ્ધિની કામના કરી હતી. આ દરમિયાન વિદેશની ધરતી પર જલારામ જયંતિ કાર્યક્રમનું આયોજન કરનારા જય જલારામ યુવક મંડળના કાર્યની સરાહના કરી હતી અને તેઓએ ખુબ ખુબ અભિનંદન પાઠવ્યા હતા.
