-
બીજા ચરણમાં તા.3ડિસે.ના સાંજે 5:00 વાગ્યાથી 5 ડિસે.ના સાંજે 5:00 વાગ્યા સુધી દાનહ અને દમણ-દીવમાં દારૂનું વેચાણ અને પિરસવા ઉપર રહેનારો પ્રતિબંધ
-
શરાબ શોખીન પ્રવાસીઓએ દારૂબંધીના સમયગાળા દરમિયાન દાદરા નગર હવેલી અને દમણ-દીવનો પ્રવાસ ટાળવો તેમના હિતમાં રહેશે
(વર્તમાન પ્રવાહ ન્યુઝ નેટવર્ક)
દમણ, તા.17 : ગુજરાત વિધાનસભાની ચૂંટણીને અનુલક્ષી દાદરા નગર હવેલી અને દમણ-દીવમાં પ્રથમ ચરણની ચૂંટણી માટે તા.29મી નવેમ્બરના સાંજે 5:00 વાગ્યાથી 1લી ડિસેમ્બર, 2022ના સાંજે 5:00 વાગ્યા સુધી દારૂની ડિસ્ટીલરીઓ, બ્રેવરી, દારૂના હોલસેલ, છૂટક અને બાર અને રેસ્ટોરન્ટમાં વેચાણ અને દારૂ-બિયરને પિરસવા ઉપર પ્રતિબંધ ફરમાવવામાં આવ્યો છે.
ગુજરાત વિધાનસભાની બીજા ચરણની ચૂંટણી માટે તા.3 ડિસેમ્બરના સાંજે 5:00 વાગ્યાથી પાંચમી ડિસેમ્બરના સાંજે 5:00 વાગ્યા સુધી આ ફરમાન જારી રહેશે.
મત ગણતરીના દિવસે 8મી ડિસેમ્બર, 2022ના રોજ પણ દાદરા નગર હવેલી અને દમણ-દીવમાં સંપૂર્ણ દારૂબંધી રહેશે.
અત્રે નોંધનીય છે કે, ગુજરાત વિધાનસભાનીચૂંટણીને લઈને 29મી નવેમ્બરના સાંજે 5:00 વાગ્યાથી 1લી ડિસેમ્બરના સાંજે 5:00 સુધી અને 3 ડિસેમ્બરના સાંજે 5:00 થી 5 ડિસેમ્બરના સાંજે 5:00 વાગ્યા સુધી દાદરા નગર હવેલી અને દમણ-દીવમાં દારૂબંધી રહેવાની છે. શરાબ રસિકોએ પોતાનો ક્વોટા દારૂબંધી લાગવા પહેલાં અને વચ્ચે તા.1લી ડિસેમ્બરના સાંજે 5:00 વાગ્યાથી અથવા 2 ડિસેમ્બરના રોજ લઈ લેવો પડશે. શરાબ શોખીન પ્રવાસીઓએ દારૂબંધીવાળા દિવસોએ દાદરા નગર હવેલી અને દમણ-દીવનો પ્રવાસ ટાળવો તેમના હિતમાં રહેશે.
સંઘપ્રદેશ દાનહ અને દમણ-દીવની સરહદ ઉત્તર ગુજરાત અને મધ્ય ગુજરાત સાથે જોડાયેલી નથી ત્યારે બીજા ચરણની ચૂંટણી દરમિયાન પ્રદેશમાં જાહેર કરેલ દારૂબંધી સુસંગત નહીં હોવાનો મત
(વર્તમાન પ્રવાહ ન્યુઝ નેટવર્ક)
દમણ, તા.17 : સંઘપ્રદેશ દાદરા નગર હવેલી અને દમણ-દીવ પ્રશાસનના એક્સાઈઝ વિભાગ દ્વારા ગુજરાત વિધાનસભાની ચૂંટણીને લઈ દાદરા નગર હવેલી અને દમણ-દીવ એક્સાઈઝ ડયુટી રૂલ્સ 111 રૂલના પેટા રૂલ 4 અંતર્ગત જાહેર કરવામાં આવેલ દારૂ-બિયરના વેચાણ, વિતરણ અને સર્વિસ સંબંધના નોટિફિકેશનમાં બીજા ચરણની ગુજરાત વિધાનસભાની ચૂંટણી મુખ્યત્વે મધ્ય ગુજરાત અને ઉત્તર ગુજરાતમાં છે. મધ્ય ગુજરાત અને ઉત્તર ગુજરાત સાથે દાદરા નગર હવેલીઅને દમણ-દીવના કોઈપણ જિલ્લાની સરહદ જોડાયેલી નથી. તેથી બીજા ચરણ માટે દાદરા નગર હવેલી અને દમણ-દીવમાં જાહેર કરેલ દારૂબંધી સુસંગત દેખાતી નથી.