વાપી રાતાનો દયાળસિંગ પુરોહિત ટેમ્પામાં ચોખાનો જથ્થો લઈને જતો હતો : પોલીસે 500 કિલો જથ્થો કબજે લીધો
(વર્તમાન પ્રવાહ વાપી બ્યુરો)
વાપી, તા.05: પારડીના ખડકી ગામે ગરીબો માટેના રેશનિંગ અનાજનો ભરીને જઈ રહેલાટેમ્પોને જાગૃત નાગરિકોએ અટકાવીને પોલીસને જાણ કરી હતી. પોલીસે અંદાજીત 500 કિ.ગ્રા. ચોખાનો જથ્થો કબજે લઈને વધુ તપાસ હાથ ધરી છે.
પ્રાપ્ત વિગતો અનુસાર ખડકી ગામે કાર્યરત વર્ષાબેન ધનસુખભાઈ પટેલની દુકાનમાંથી સરકારી રેશનિંગ અનાજનો જથ્થો બ્લુ કલર, થ્રી વ્હિલર ટેમ્પો નં.જીજે 15 એ.યુ. 9972માં ભરીને લઈ જવાઈ રહ્યો હતો. ત્યારે ગામના જાગૃત નાગરિકોને ધ્યાને આવતા નિશાળ ફળિયા આગળ અટકાવ્યો હતો. આ બાબતે ટેમ્પો ચાલક દયાળસિંગ બુધસિંગ રાજપુરોહિત રહે.વાપી રાતા ગોળ ગોળ જવાબ આપ્યો હતો તેથી ગ્રામજનોએ પારડી પોલીસને જાણ કરી હતી. પોલીસ ઘટના સ્થળે આવીને ટેમ્પો ચાલકની પૂછપરછ કરી ટેમ્પામાં રાખેલ અંદાજીત 500 કિ.ગ્રા. ચોખાનો જથ્થો અને ટેમ્પો પો.સ્ટે.માં લઈ જવાયો હતો. ટેમ્પોમાં થોડી ખાલી બોરી પણ હતી. જથ્થો સરકારી છે કે કેમ તે પુરવઠા વિભાગને પોલીસે જાણ કરી છે. રિપોર્ટ બાદ વધુ તપાસ ધરવામાં આવશે.
