(વર્તમાન પ્રવાહ ન્યુઝ નેટવર્ક)
સેલવાસ,તા.30 : દુનિયામાં ચીન, જાપાન, અમેરિકા, બ્રાઝિલ સહીત અન્ય દેશોમાં વધતા જતા કોવિડ-19ના કેસ અને સંઘપ્રદેશ દાદરા નગર હવેલી અને દમણ-દીવમાં સંભવિત કોરોનાની લહેરને ધ્યાનમાં રાખીને સંઘપ્રદેશ આરોગ્ય વિભાગ દ્વારા અગમચેતીના પગલાં લેવાઈ રહ્યા છે. જેમાં પ્રદેશના તમામ વિસ્તારની દરેક ખાનગી અને સરકારી હોસ્પિટલોમાં બે દિવસ પહેલા જ મોકડ્રીલ યોજીને બેડ, ઓક્સિજન, વેન્ટિલેટર, દવાઓ વગેરેની તપાસ કરવામાં આવી હતી. દરમિયાન કોરોના વાઈરસ નહીં ફેલાઈ એ માટે તકેદારીના ભાગ રૂપે આરોગ્ય વિભાગ દ્વારા સેલવાસ શહેરમાં દુકાને દુકાને જઈ ટેસ્ટિંગ શરૂ કરી દેવાયું છે. જેમાંફળ-ફૂલ વિક્રેતા, શાકભાજી વિક્રેતા, ચપ્પલની દુકાન, કપડાં, મીઠાઈ, કરિયાણા અને અન્ય નાની મોટી દુકાનોમાં જઈ દુકાનદારો તથા કામદારોના કોરોના ટેસ્ટ સેમ્પલ લેવામાં આવી રહ્યા છે અને તેના ટેસ્ટિંગ કરવામાં આવી રહ્યા છે.
