કાર અને દારૂ મળી 16 લાખનો મુદ્દામાલ કબ્જે
(વર્તમાન પ્રવાહ ન્યુઝનેટવર્ક)
પારડી, તા.08: દમણથી દારૂ હેરાફેરી કરવા બુટલેગર હવે મોંઘીદાટ કારનો ઉપયોગ કરવામાં પણ અચકાતા નથી ત્યારે ગત રાત્રીના દમણથી એક લકઝરીયસ ઓડી કારમાં દારૂનો જથ્થો ભરી નીકળી હતી પરંતુ આ બાબતની માહિતી વલસાડ એલસીબીને મળતા ખડકી હાઈવે એપીકલ હોટલ પાસે વોચ ગોઠવી હતી. અને પોલીસે રોકતા ચાલક પૂર ઝડપે કાર હંકારી મૂકી હતી જેનો પોલીસે પણ ફિલ્મી સ્ટાઈલે પીછો કરતાં અંદાજે 15 થી 18 કિમીની દોડ બાદ કાર ઝડપાઈ હતી.
વલસાડ એલસીબીની ટીમને મળેલી બાતમીના આધારે ખડકી એપીકલ હોટલ સામે નેશનલ હાઈવે નં.48 પર વોચ ગોઠવી હતી અને એપ્લાય ફોર રજીસ્ટ્રેશન લખેલી ઓડી કાર આવતા તેને અટકાવવાનો ઈશારો કરતાં કાર ચાલક કારને પૂર ઝડપે હંકારી લઈ ગયો હતો જેનો એલસીબી પોલીસે ફિલ્મી સ્ટાઈલે પીછો કરતાં કાર ચાલકે પારડી દમણીઝાંપાનો બ્રિજ નીચે ઉતારી યુ-ટર્ન મારી ખડકી તરફ ભગાવી હતી અને મોતીવાડાથી દમણ તરફ હંકારી હતી જેનો પોલીસે સતત પીછો કર્યો હતો અને ક્લસર બે માલિક નજીક ફરી કારને આંતરતા કાર ચાલકે પૂર ઝડપે કારને ટર્ન મારી ઉદવાડા સ્ટેશન તરફ ભગાવી હતી અને કીકરલા પ્રા શાળા આગળથી સાંકડી ગલીમાં ભાગવા જતાં કાર ઝાડ સાથે અથડાઈ હતી. પોલીસે આ દારૂ ભરેલી ઓડીને પકડવા સતત15 થી 18 કિલોમીટરની આમ તેમ દોડ લગાવી પડી હતી તો બીજી તરફ કાર અથડાયા બાદ પણ ખેપિયો અને ચાલક કાર મૂકી ભાગવા નીકળતા ક્લીનર પરેશ નવીનચંદ્ર રાઠોડ રહે.નાની દમણ દુનેઠા મારોલ પાર્ક ઝડપાયો હતો. જ્યારે ચાલક હેમંત મોહનભાઈ પટેલ રહે.દમણ ભીમપોર ભાગવામાં સફળ રહ્યો હતો. આ કારમાંથી પોલીસને અલગ બ્રાંડની દારૂની બોટલ નંગ 768 કિમત રૂા.1,03,200/- નો જથ્થો હાથ લાગ્યો હતો અને રૂા.15 લાખની ઓડી કાર અને દારૂ મળી રૂા.16,08,700/-નો મુદ્દામાલ કબ્જે લેવામાં આવ્યો હતો. આ દારૂનો જથ્થો વિરલ રાજેશભાઈ પટેલ રહે.દમણ મરવડ અને યશ બાબલો પટેલ રહે.દમણ મોટીવાંકડે ભરાવી આપ્યો હોવાનું બહાર આવતા આ બંનેને વોન્ટેડ જાહેર કરવામાં આવ્યા છે.
