ધરમપુર-વાપી ખાતે ન્યુ એડિશનલ ડિસ્ટ્રિક્ટ કોર્ટ રૂા.1.36 કરોડના ખર્ચે નવી ઈમારતની જાહેરાત
(વર્તમાન પ્રવાહ વાપી બ્યુરો)
વાપી, તા.26: પારડીના ધારાસભ્ય નાણામંત્રી કનુભાઈ દેસાઈએ તેમના દ્વારા રજૂ થયેલા વર્ષ 2023-24ના બજેટમાં વલસાડ જિલ્લા માટે અનેક નાની મોટી જોગવાઈ કરવામાં આવી છે. જેમાં વાપી-ઉમરગામમાં પુર્ણ સમયની લેબર કોર્ટ કાર્યરત કરવાની જાહેરાત કરાઈ છે.
છેલ્લા 58 વર્ષમાં અનાવિલ સમાજના ત્રીજા નાણામંત્રી કનુભાઈ દેસાઈએ સતત બીજુ વખત બજેટ વિધાનસભામાં રજૂ કર્યું હતું. જેમાં અનેક નવા પ્રોજેક્ટ જાહેર કરાયા છે. જેમાં વાપીમાં ન્યુ એડિશનલ ડિસ્ટ્રિક્ટકોર્ટ તેમજ ધરમપુરમાં પણ ન્યુ એડિશનલ ડિસ્ટ્રિક્ટ કોર્ટની જાહેરાત કરાઈ છે. બજેટમાં કોઈપણ નવા કરવેરા નાખ્યા સિવાય નાણામંત્રીએ 900 ઉપરાંત કરોડનું પુરાંતવાળું બજેટ રજૂ કર્યું હતું. વાપી, સરીગામ, ઉમરગામમાં શ્રમિકો વધુ હોવાથી નાણામંત્રીએ વાપી-ઉમરગામમાં પૂર્ણ સમયની લેબર કોર્ટ કાર્યરત કરવાની જાહેરાત પણ બજેટમાં કરી છે. તેમજ પ્રવાસન ક્ષેત્રના વિકાસ માટે બજેટમાં વિવિધ જોગવાઈ અનુસાર વલસાડ જિલ્લાને તેનો લાભ થનાર છે. ગત બજેટમાં દરિયાઈ પાઈપલાઈન પ્રોજેક્ટની જોગવાઈ અનુસાર તેમાં પણ કામ આગળ વધી રહ્યું છે. વાપીમાં મીની હોસ્પિટલનું કામ પણ ચાલું છે. વાપી વાસીઓ માટે નાણામંત્રી સ્થાનિક હોવાથી ગૌરવની વાત કરી શકાય એમ છે.