ચૂંટણી જાહેર કરવામાં ઓ.બી.સી. બેઠકોના કોકડાનું ગ્રહણ નડી રહ્યું છે : ત્રણેય પાલિકાઓની મુદત 25 ફેબ્રુઆરીએ પૂર્ણ થઈ ગઈ છે
(વર્તમાન પ્રવાહ વાપી બ્યુરો)
વાપી, તા.27: વલસાડ જિલ્લાની વલસાડ, પારડી અને ધરમપુર પાલિકાઓની ચૂંટાયેલી પાંખની મુદ્દત પુરી થઈ ગઈ છે. તેથી પાલિકાઓના વહિવટનું સુકાન વહિવટદારો પાસે રહેશે. બીજી તરફ નવિન ચૂંટણી જાહેરાતના ઈંતજાર સાથે રાજકીય તખ્તામાં થનગનાટ શરૂ થઈ ગયો છ.
વલસાડ જિલ્લાની વલસાડ, પારડી અને ધરમપુર પાલિકાઓની ચૂંટાયેલી પાંખની મુદત ગત તા.25 ફેબ્રુઆરી 2023માં પુરી થઈ ચુકી છે. તેથી ત્રણેય પાલિકાઓનું સુકાન વહિવટદારોના હાથમાં સરકી ગયું છે. નવિન ચૂંટણીની જાહેરાત પણ હાલ પુરતી અટવાઈ છે કારણ કે રાજકોશ ગીર સોમનાથ, બનાસકાંઠા જિલ્લાની કેટલીક પાલિકાઓની મુદત પણ પૂર્ણ થયેલી છે પરંતુ તમામ પાલિકાની નવિન ચૂંટણીમાં ઓ.બી.સી. બેઠકો લાગું કરવાની છે અને આ માટે જસ્ટીસ કે.આર. ઝવેરી પંચ (આયોગ)નો આ બેઠકો માટેનો રિપોર્ટ જાહેર થયો નથી તેની અસર વલસાડ જિલ્લાની ત્રણ પાલિકાઓને પણ છે. સંભવતઃ આયોગનો રિપોર્ટ આગામી 12માર્ચ 2023 સુધી આવી શકે એમ છે. ત્યાર બાદ પાલિકા ચૂંટણીઓ અંગેનું જાહેરનામું બહાર પડશે. એટલીસ્ટ ચૂંટણી નક્કી છે એટલે રાજકીય પાર્ટીઓમાં હિલચાલ શરૂ થઈ ગઈ છે. રિપિટ કે નો રિપિટ કઈ ફોમ્યુલા જાહેર થશે તેથી મથામણ પણ ચૂંટણી લડનારા પણ હાલ કરી રહ્યા છે. પુરી થયેલી મુદત સુધી ત્રણેય પાલિકામાં ભાજપનું શાસન હતું હવે ફરી નવી ચૂંટણી જંગના મંડાણ થશે.