(વર્તમાન પ્રવાહ ન્યુઝ નેટવર્ક)
સેલવાસ, તા.03: સેલવાસમાં મેડિકલ કોલેજની છોકરીઓ માટેની હોસ્ટેલ નજીક સ્ટેડીયમમાં સાંજથી લઈ મોડી રાત્રિ સુધી ઘોંઘાટ કરાતો હોવાની ફરિયાદ ઉઠવા પામી હતી. તેથી સંઘપ્રદેશ ભાજપ એસ.ટી. મોર્ચા દ્વારા ઘોંઘાટને બંધ કરાવવા દાનહ જિલ્લા કલેક્ટર શ્રીમતી ભાનુ પ્રભાને રજૂઆત કરવામાં આવી છે.
પ્રાપ્ત માહિતી મુજબ સંઘપ્રદેશ દાદરા નગર હવેલીના સાયલી ખાતે મેડિકલ કોલેજ આવેલ છે. જેમાં અભ્યાસ કરનારી છોકરીઓ માટેની હોસ્ટેલ સેલવાસના સ્ટેડિયમ નજીક આવેલ છે. ગર્લ્સ હોસ્ટેલની નજીક આવેલ સ્ટેડિયમમાં સાંજના સમયથી લઈ મોડી રાત્રીના સમય સુધી જોર જોરથી ઘોંઘાટ થતો હોવાની ફરિયાદો ઉઠવા પામી હતી. ઘોંઘાટના કારણે હોસ્ટેલમાં રહેતી વિદ્યાર્થીનીઓને વાંચવા, ઉંઘવા કે અન્ય કોઈ કાર્યક્રમમાં ઘણી તકલીફો પડે છે. તેથી ઘોંઘાટ બંધ કરાવવા સંઘપ્રદેશ ભાજપ એસ.ટી. મોર્ચા દ્વારા જિલ્લા કલેક્ટર શ્રીમતી ભાનુ પ્રભાને લેખિત રજૂઆત કરવામાં આવી છે.
સંઘપ્રદેશ ભાજપ એસ.ટી. મોર્ચા દ્વારા કલેક્ટરશ્રીને કરાયેલી રજૂઆતમાં જણાવાયું છે કે, સેલવાસશહેરની વચ્ચોવચ સ્ટેડિયમ ગ્રાઉન્ડ આવેલ છે અને સ્ટેડિયમના એક છેડે નમો મેડીકલ કોલેજમાં અભ્યાસ કરતી વિદ્યાર્થીનીઓને રહેવા માટેની હોસ્ટેલ આવેલી છે. સ્ટેડિયમ પર દિવસભરથી લઈ રાત્રિના સમયે કોઈને કોઈ મેચ રમાડવામાં આવે છે કે કોઈ અન્ય કાર્યક્રમો યોજાતા હોય છે. સ્ટેડિયમમાં રમાડાતી મેચ દરમ્યાન લોકોની ભારે ભીડ પણ રહે છે અને જોર જોરથી ડીજે પણ વગાડવામાં આવે છે. જેના કારણે હોસ્ટેલમાં રહેતી વિદ્યાર્થીનીઓને ભણતરમાં ઘણી ખલેલ પડી રહી છે. જેથી સંઘપ્રદેશ ભાજપ એસ.ટી. મોર્ચાના જિલ્લા મંત્રીશ્રી દ્વારા કલેક્ટરશ્રીને અનુરોધ કરાયો છે કે રાતના સમયે ઘોંઘાટ સાથે કાર્યક્રમો કે ટૂર્નામેન્ટો રમાડવામાં આવે છે એને તાત્કાલિક બંધ કરાવવામાં આવે.
