(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.20: ચીખલી તાલુકાના કુકેરી ગામે ત્રણ દિવસ પૂર્વેના અકસ્માતના બનાવવામાં સ્થાનિક યુવાનોએ આસપાસના સીસીટીવી કેમેરાના ફૂટેજ ખગોળી અકસ્માત કરી ભાગી જનાર પીકઅપ ચાલકને શોધી કાઢતા પોલીસે ધરપકડ કરી કાયદેસરની કાર્યવાહી કરી હતી.
કુકેરીમાં ત્રણ દિવસ પૂર્વે સુરખાઈ અનાવલ માર્ગ ઉપર કુકેરી પ્રાથમિક શાળા પાસે અજાણ્યા વાહન ચાલકે ટક્કર મારતા મોટરસાયકલ સવાર સ્થાનિક નિવૃત શિક્ષક જયસિંહ ડાહ્યાભાઈ પરમારનું મોત નીપજ્યું હતું. અજાણ્યો વાહન ચાલક મોટર સાયકલને ટક્કર મારી ફરાર થઈ ગયો હતો.
ઉપરોક્ત બનાવ બાદ સ્થાનિક યુવાનો દ્વારા સુરખાઈ – અનાવલ માર્ગ ઉપર સુરખાઈ, કુકેરી માધાતળાવ, ધોળીકુવા સહિતના વિસ્તારમાં સીસીટીવી કેમેરાના ફૂટેજો ચેક કરતા બનાવના સમયની આસપાસ એક બોલેરો પિકઅપ પુરપાટ ઝડપે પસાર થતી હોવાનું નજરે પડ્યું હતું. આ બોલેરો પિકઅપ જ શંકાસ્પદ જણાતા યુવાનો દ્વારા ઊંડાણ પૂર્વકની તપાસ કરતા આજ પિકઅપનો ચાલક અકસ્માત કરી ભાગી ગયો હોવાનું બહાર આવતા પોલીસે જીજે-19-એક્સ-9805 નંબરની પિકઅપનો ચાલક નરેશ લલ્લુભાઈ પટેલ (રહે.તરકાણી નવા ફળીયા તા.મહુવા જી.સુરત) ની ધરપકડ કરી કાયદેસરની હાથ ધરી હતી.
કુકેરીના અકસ્માતના બનાવમાંસ્થાનિક યુવાનોની મહેનત રંગ લાવી હતી. અને આ યુવાનોએ મહેનત કરવાથી શોધવાથી બધું જ મળે ની યુક્તિને સાર્થક કરી હતી.
