આગની લગોલગ ઉભેલા આઠ વાહનો બચી ગયા
(વર્તમાન પ્રવાહ વાપી બ્યુરો)
વાપી, તા.27 : વલસાડ ડિ.એસ.પી. કચેરી સામે આવેલ ખુલ્લા મેદાનમાં રવિવારે રાતે અચાનક આગ લાગતા દોડધામ મચી જવા પામી હતી. પાલિકા ફાયર બ્રિગેડ સમયસર ઘટના સ્થળે આવી આગ બુઝાવી દેતા મોટી હોનારત ટળી હતી.
વલસાડ ડિ.એસ.પી. કચેરી સામે હાજી માર્કેટ પાસે રવિવારે રાતે અચાનક ખુલ્લા મેદાનમાં આગ ભભૂકી ઉઠી હતી. મેઈન રોડ ઉપર રાત્રિ ફરજ બજાવતા પોલીસ જવાનોનું તાત્કાલિક આગ તરફ ધ્યાન જતા તુરંત પાલિકા ફાયર બ્રિગેડને જાણ કરતા જ ફાયર ટીમ સમયસર ઘટના સ્થળે દોડી આવી હતી તેમજ ઝડપથી આગ વધુ પ્રસરે તે પહેલાં બુઝાવી દીધી હતી. આગની ઘટનામાં સદ્નસીબે આગ પાસે જ લગોલગ સાત-આઠ વાહનો પાર્ક કરાયેલા હતા તે આગથી બચી ગયા હતા. નહીતર કોઈ મોટી હોનારત ઘટતા વાર નહીં લાગત, અલબત્ત આગ લાગવાનું કારણ અકબંધ રહ્યું છે.
