મૂળ ઓરિસ્સાના બે આરોપીની અટક ચણવઈ બ્રીજથી પોલીસ નાકાબંધી તોડી કાર હાઈવે પર ભાગી છૂટી હતી
(વર્તમાન પ્રવાહ વાપી બ્યુરો)
વાપી, તા.05: નેશનલ હાઈવે ધરમપુર ચોકડી પાસે આજે બુધવારે રૂરલ પોલીસે એક કારનો ફિલ્મી ઢબે પીછો કરી 100 કિલો ઉપરાંત ગાંજાનો જથ્થો ભરેલ કારને ઝડપી પાડી હતી. ગાંજાના જથ્થા સાથે મૂળ ઓરિસ્સાના બે આરોપીની પોલીસે અટક કરી હતી.
વલસાડ રૂરલ પોલીસને મળેલી બાતમી આધારે આજે ચણવઈ બ્રિજ ઉપર વાહન નાકાબંધી કરી હતી તે દરમિયાન નાકાબંધી તોડીને કારનં.આર.જે. 06 સી.ઈ. 7934 ભાગી છૂટી હતી. તેથી પોલીસે ફિલ્મી ઢબે કારનો પીછો કર્યો હતો. પોલીસ કાર્યવાહી દરમિયાન હાઈવે ઉપર ટ્રાફિક પણ જામ થતો રહ્યો હતો. અંતે ધરમપુર ચોકડી ઉપર પોલીસે કારને આંતરી હતી. તપાસ કરતા કારના ચોર ખાનામાંથી 100 કિલો ઉપરાંત ગાંજાનો જથ્થો પોલીસને મળી આવ્યો હતો. તેથી ગાંજો અને કાર મુદ્દામાલમાં જપ્ત કરી મૂળ ઓરિસ્સાના બે આરોપીની અટક કરી વધુ તપાસ હાથ ધરી હતી. ગાંજાનું રેકેટ ખાસ કરીને ઓરિસ્સા સાઈડથી ચલાવવામાં આવે છે. મોટાભાગના આરોપી ઓરિસ્સા અને રાજસ્થાનના ગાંજા નેટવર્ક સાથે સંકળાયેલા છે.
