દોઢ વર્ષની કેશા જીંદગી સામે જંગ હારી ગઈ
(વર્તમાન પ્રવાહ વાપી બ્યુરો)
વાપી, તા.26: ધરમપુરના ગનવા ગામે આજે સવારે ગોઝારો અકસ્માત સર્જાયો હતો. સમગ્ર દુનેઠાનો માહ્યાવંશી પરિવારનીમાતા-પુત્રી સપ્તશ્રુંગી દર્શન કરી દમણ પરત આી રહ્યા હતા ત્યારે તેમની કાર ગનવા ગામે ઝાડ સાથે ભટકાતા અકસ્માત સર્જાયો હતો. જેમાં માતા ઘાયલ થઈ હતી જ્યારે દોઢ વર્ષની પૂત્રીનું સારવારમાં કરુણ મોત થવા પામ્યું હતું.
અકસ્માતની પ્રાપ્ત વિગતો મુજબ ધરમપુર પો.સ્ટે.માં વિષ્ણુભાઈ બાબુભાઈ માહ્યાવંશીએ નોંધાવેલ ફરિયાદ અનુસાર તેમની બ્રેજા કાર નં.ડીડી 03 કે 8297 લઈને પત્ની સાધનાબેન વિષ્ણુભાઈ માહ્યાવંશી અને દોઢ વર્ષની પૂત્રી કેશા ચાલક યોગેશ આહિર સપ્તશ્રુંગી દર્શન કરવા ગયા હતા. પરત ફરતા ગનવા ગામે કાર ઝાડ સાથે ભટકાતા અકસ્માત સર્જાયો હતો. અકસ્માતમાં સાધનાબેનને પગમાં ઈજાઓ થઈ હતી જ્યારે માસુમ પુત્રી કેશા ગંભીર રીતે ઘાયલ થઈ હતી. બન્નેને સાંઈનાથ હોસ્પિટલમાં સારવાર માટે ખસેડયા હતા. સારવારમાં માસુમ દોઢ વર્ષિય બાળકી કેશા જીંદગીનો જંગ હારી ગઈ હતી. પોલીસે ચાલક વિરૂધ્ધ ફરિયાદ નોંધી વધુ તપાસ હાથ ધરી હતી.
