વાપી, પારડી સરકારી કચેરીઓમાં કોઈ કર્મચારી ચાલતું કે સાયકલ ઉપર ના ગયો
(વર્તમાન પ્રવાહ વાપી બ્યુરો)
વાપી, તા.09
વલસાડ જિલ્લા કલેક્ટરાલય દ્વારા ખુબ આવકાર્ય અને જરૂરી નિર્ણય લેવાયો હતો કે પ્રત્યેક શનિવારે સપ્તાહમાં એકવાર સરકારી કર્મચારીઓ ચાલતા કે સાઈકલથી કચેરીએ જવું-આવવું. નિર્ણય સ્વાસ્થ્ય પર્યાવરણ અને દેશના ઈંધણ માટે અતિ મહત્ત્વનો લેખાવી શકાય તેવો નિર્ણયના અમલના પહેલા શનિવારે જ ફિયાસ્કો થયો હતો. માત્ર ટોચના ગણ્યા ગાંઠયા કર્મચારીઓ ચાલતા ગયા હતા.
વલસાડ કલેક્ટર દ્વારા સ્વાસ્થ્ય-પર્યાવરણની જાળવણી માટે સુચક અને આવકારદાયક લેવાયેલ આ નિર્ણય સરકારી બાબુઓ અનુકુળ આવ્યો નહોતો માત્ર વલસાડ કચેરીએ ઐપચારિકતા જોવા મળી હતી. બાકી વાપી, પારડીની કચેરીઓમાં સરકારી કર્મચારીઓ કાર કે મોપેડ મારફતે જ ઓફિસે પહોંચ્યા હતા. તેથી જરૂરી નિર્ણયનો અમલ થાય તે પહેલાં જ છેદ ઉડી ગયો હતો. જાહેર અનેવ્યક્તિગત હિત માટે સપ્તાહમાં એક શનિવારે ઓફિસે ચાલતા કે સાયકલ ઉપર જવાથી સ્વાસ્થ્ય પણ સારું રહે અને ઈંધણ-પ્રદૂષણનો પણ ફાયદો થાય. વર્ષના 52 શનિવાર એટલે બે મહિના વાહનો ચાલતા અટકી જાત પણ આ નિર્ણયની ગંભીરતા સરકારી કર્મચારીઓમાં જોવા મળી નહોતી.
