(વર્તમાન પ્રવાહ ન્યુઝ નેટવર્ક)
પારડી, તા.24: પારડીના ધગડમાળ ખાતે નેશનલ હાઈવે નં.848 પર પાર્કિંગ લાઈટ વિના રોંગ સાઈડે એક ટ્રક પાર્ક કરી હતી. આ દરમ્યાન પારડીથી છૂટક મજૂરી કામ કરી પોતાના ઘરે કપરાડા બાઈક તરફ જઈ રહેલા યુવાનને પાર્ક કરેલ આ ટ્રક નજરે ન ચઢતા તે ટ્રક સાથે અથડાતા ગંભીર ઈજાને પગલે ઘટના સ્થળે જ તેનું કરૂણ મોત નીપજ્યું હતું.
વલસાડ જિલ્લાના કપરાડા તાલુકાના ફળી ગામ મોટીશેરી ફળિયા ખાતે રહેતા રમણભાઈ લક્ષેભાઈ બળી ઉ.વ. 36 જે ગત મંગળવારના રોજ પોતાની બાઈક નંબર જીજે-15-બીએ-7004 લઈ પારડી મજૂરી કામે આવ્યા હતા. જ્યાંથી તેઓ રાતે પરત ઘરે જઈ રહ્યા હતા ત્યારે નેશનલ હાઈવે નંબર 848 ધગડમાળ ગામે રોંગ સાઈડે ટ્રક નંબર જીજે-15-એવી-0309 પાર્ક હતી. જેની પાર્કિંગ લાઈટો પણ ચાલુ ન હતી જેથી રમણભાઈ ટ્રક જોઈ ન શકતા તેધડાકાભેર બાઈક સાથે ટ્રકમાં ભટકાયા હતા. આ અકસ્માતનો અવાજ સાંભળી આજુબાજુના લોકો દોડી આવ્યા હતા અને 108 એમ્બુલન્સ તેડાવી હતી. જોકે તે પહેલા રમણભાઈને પહોંચેલી ગંભીર ઈજાને પગલે કમકમાટી ભર્યું મોત નીપજ્યું હતું. જ્યારે સ્થાનિકોના જણાવ્યા પ્રમાણે ધડગમાળ વિસ્તારમાં ટ્રક ટેમ્પા જેવા મોટા વાહનો કાયમી ધોરણે આ રીતે પાર્ક કરવામાં આવે છે. બાઈક ચાલક ઉભેલી ટ્રક જોઈ ન શકતા અકસ્માત સર્જાતા જીવ ખોવાનો વારો આવ્યો છે. જેને લઈ સ્થાનિકોમાં આક્રોશ જોવા મળ્યો હતો. જોકે બચાવમાં ટ્રક ચાલકે પોલીસ સમક્ષ ટાયર બદલવા ટ્રક ઉભી રાખી હોવાનો લુલો બચાવ કર્યો હતો.
