પ્લાસ્ટીક અને લાકડાનો સરસામાન હોવાથી આગે વિકરાળ સ્વરૂપ પકડયું હતું : 3 બાઈક પણ ખાખ
(વર્તમાન પ્રવાહ વાપી બ્યુરો)
વાપી, તા.28: વાપી વિસ્તારમાં આગ લાગવાના બનાવો છેલ્લા સપ્તાહમાં લગાતાર બની રહ્યા છે. બે સ્થળોએ આઠ જેટલા ભંગારના ગોડાઉન અને એક ઓટો શો રૂમમાં આગ લાગી હતી. આગના બનાવો વણથંભ્યા બની રહ્યા છે. શનિ-રવિ મધરાતે વાપી મચ્છી માર્કેટમાં આવેલ મંડપ ડેકોરેશન ગોડાઉનમાં આગ લાગી હતી. આગને લઈ ભારે દોડધામ મચી જવા પામી હતી.
વાપી મચ્છી માર્કેટમાં શનિ-રવિવારે રાતે માર્કેટમાં આવેલ જી.ઈ.બી.ના ટ્રાન્સફોર્મરમાં ભયંકર ધડાકો થયો હતો. જેને લઈને બાજુમાં આવેલ મંડપ ડેકોરેશન ગોડાઉનમાં ભારે તણખા ઉઠી પડતા ગોડાઉનમાં પણ આગ ભભૂકી ઉઠયું હતું. ગોડાઉનમાં પ્લાસ્ટીક અને લાકડાનો સામાનભરેલો હોવાથી આગે વિકરાળ સ્વરૂપ પકડયુ હતું. સ્થાનિકોએ આગ બુઝાવવાની જહેમત આરંભી દઈને જી.ઈ.બી. ફાયર, તથા ડેકોરેશન ગોડાઉન માલિકને જાણ કરી હતી. ફાયર બ્રિગેડ અને જી.ઈ.બી.ના સ્ટાફે ઘટના સ્થળે દોડી આવી આગ કન્ટ્રોલ કરી હતી. જી.ઈ.બી.એ સમગ્ર વિસ્તારમાં લાઈટ બંધ કરી દીધી હતી. આગમાં ત્રણ જેટલા બાઈક પણ બળીને ખાખ થઈ ગયા હતા. બે દિવસ પહેલા વલસાડમાં પણ મંડપ ડેકોરેશન ગોડાઉનમાં આગ લાગી હતી.
