(વર્તમાન પ્રવાહ ન્યુઝ નેટવર્ક)
સેલવાસ, તા.25 : દાદરા નગર હવેલીના નરોલીના હવેલી ફળિયા તરફ જતા સાંકડા રસ્તા પર ચાલક ડમ્પરને રિવર્સ લઈ રહ્યો હતો તે દરમિયાન પાછળ મોપેડ ઉપર આવી રહેલી યુવતીને ટક્કર લાગતા યુવતીના પગ ઉપરથી ટાયર ફરી વળતાં પગના ભાગે ગંભીર ઈજા થઈ હતી. યુવતીને તાત્કાલિક 108 ઈમરજન્સી એમ્બ્યુલન્સ દ્વારા સારવાર અર્થે સિવિલ હોસ્પિટલમાં ખાતે ખસેડવામાં આવી હતી.
પ્રાપ્ત વિગત અનુસાર નરોલી હવેલી ફળીયા તરફ જતા સાંકડા રસ્તા પર ડમ્પર ચાલક રિવર્સ લઈ રહ્યો હતો. ઘરેથી નોકરી પર જવા માટે નીકળેલ યુવતી લક્ષ્મી બાબુલાલ (ઉ.વ.24) રહેવાસી નરોલી મોપેડ લઈને નીકળી હતી જે ડમ્પર પાછળ જ હતી, ડમ્પરે મોપેડ સવાર યુવતીને ટક્કર મારતા લક્ષ્મી નીચે પટકાઈ હતી અને તેના પગ ઉપરથી ડમ્પરનું પાછળનું ટાયર ફરી વળતા ગંભીર ઈજાઓ થઈ હતી.
આ અકસ્માત થતા આજુબાજુના લોકો ઘટના સ્થળે દોડી આવ્યા હતા અને ઈમરજન્સી 108એમ્બ્યુલન્સને બોલાવી સારવાર અર્થે સેલવાસની શ્રી વિનોબા ભાવે સિવિલ હોસ્પિટલમાંલઈ જવામાં આવી હતી. ઘટના અંગે પોલીસને પણ જાણ કરતા પોલીસની ટીમ ધસી આવી ડમ્પર ચાલક જિતેન્દ્રની ધરપકડ કરી પોલીસ સ્ટેશનમાં લઈ જવામાં આવ્યો હતો. અકસ્માતની ઘટના અંગે ફરિયાદ નોંધી વધુ તપાસ નરોલી પોલીસ કરી રહી છે.
