(વર્તમાન પ્રવાહ ન્યુઝ નેટવર્ક)
ચીખલી(વંકાલ),તા.02: ચીખલી તાલુકામાં ચોમાસાની 27મી જૂનના રોજ મોડી શરૂઆત બાદ સતત પાંચ દિવસ સુધી સાર્વત્રિક વરસાદથી ખરેરા, અંબિકા, કાવેરી સહિતની લોકમાતાઓમાં પૂર સાથે સ્થાનિક કોતરો, તળાવો, ખેતરો પણ પાણીથી છલકાઈ ગયા હતા.
આ દરમિયાન શનિવારના રોજ સાંજે ચાર વાગ્યાના અરસામાં19-મીમી વરસાદ બાદ વરસાદનું જોર ઘટી ગયું હતું અને રાત્રિ દરમિયાન માંડ 8-મીમી જેટલો વરસાદ વરસ્યો હતો અને વહેલી સવારથી જ વાતાવરણ ખુલ્લી જવા સાથે સુરજદાદાના દર્શન થયા હતા અને દિવસભર તડકો રહ્યો હતો. બીજી તરફ ચીખલીમાં કાવેરી નદીની સપાટી ઘટીને 9-ફૂટે પહોંચી હતી.
વરસાદે વિરામ લેતા ખેતી કામોમાં જોતરાવા સાથે જનજીવન પણ થાળે પડ્યું હતું. મોટેભાગના માર્ગો પરથી પણ પાણી ઓસરી ગયા હતા. આલીપોરના પાદર ફળિયામાં કોયલી ખાડીના પુલનો એપ્રોચ બેસી જતા બંધ થયેલ માર્ગની માર્ગ મકાન દ્વારા મરામત કરી દેવાતા વાહન વ્યવહાર પૂનઃ શરૂ થઈ ગયો હતો.
જોકે વરસાદની બ્રેક પૂર્વે ફૂકેરીના નવા નગરમાં જગુભાઈ હળપતિના ઘરનું છત તૂટી જતા નુકસાન થયું હતું. અંબાચ ગામે મંદિર ફળિયામાં જમનાબેનના ખેતરમાં વીજપોલ ધરાશાય થયો હતો.
વરસાદના વિરામ બાદ સાદકપોર પીએચસીના સ્ટાફ દ્વારા પાણી ભરાયેલ વિસ્તારમાં તકેદારીના ભાગરૂપે ક્લોરીનેશન કરવામાં આવ્યું હતું. આ સાથે તાલુકામાં સિઝનનો કુલ વરસાદ 24.80 ઇંચ જેટલો થયો છે.
