અકસ્માત થયા બાદ ગાડીનો નંબર જાણવા અકસ્માતવાળા રોડના રસ્તા ઉપર લાગેલા 30થી વધુજગ્યાના સીસીટીવી કેમેરાની પોલીસની ટીમે કરેલી ચકાસણી
(વર્તમાન પ્રવાહ ન્યુઝ નેટવર્ક)
દમણ, તા.06 : નાની દમણની હોટલ સેન્ડી રિસોર્ટ પાસે મેઈન રોડ ઉપર એક અજાણ્યા કારચાલકે ઝડપથી ગાડી હંકારી સ્કૂલટર સવારને ટક્કર મારી અકસ્માત કર્યો હતો. અકસ્માતમાં ઘાયલ ગુલામ અલી નૂરમોહમ્મદ રહે. આઈસ ફેક્ટરી નજીક ખારીવાડ, નાની દમણને ગંભીર ઈજા પહોંચતાં સરકારી હોસ્પિટલ મરવડ ખાતે લઈ જવાયો હતો.
અકસ્માતની ખબર મળતાં નાની દમણ કડૈયા કોસ્ટલ પોલીસ સ્ટેશને અજ્ઞાત ચાલક સામે આઈપીસીની 279, 338 અને મોટર વ્હીકલ એક્ટની 177, 184, 134(એ) અંતર્ગત ગુનો નોંધી તપાસ શરૂ કરી હતી.
દમણ પોલીસે તાત્કાલિક એક્શન લઈ ગુનાની તપાસ શરૂ કરી હતી અને ઘટનાને નજરે જોનાર સાક્ષીઓની કરેલી પૂછપરછ દરમિયાન સંદિગ્ધ ગાડીની જાણકારી મળી હતી. ત્યારબાદ ગાડીના નંબર માટે દુર્ઘટનાવાળા રોડના રસ્તા ઉપર લાગેલા 30થી વધુ જગ્યાના સીસીટીવી કેમેરાની તપાસ કર્યા બાદ પોલીસને ગાડીનો નંબર મળ્યો હતો. ગાડીના નંબર મળતાં તેનો માલિક સુરત, ગુજરાતનો નિવાસી હોવાથી એક પોલીસ ટીમ બનાવી તાત્કાલિક સુરત મોકલવામાં આવી હતી. જ્યાં ગુપ્ત સૂત્રોથી માહિતી મેળવી પોલીસ ટીમ ગાડીમાલિકના ઘર સુધી પહોંચી હતી અને અકસ્માત કરવાવાળા વ્યક્તિના ઘરથી તેનેહિરાસતમાં લઈ પૂછપરછ કરતા પોતાનો ગુનો કબુલ્યો હતો.
