કેટલાક વાહનો ડૂબ્યા : ઈસ્ટ વેસ્ટ ભારે ટ્રાફિક સર્જાયો : પાલિકાના 40 ઉપરાંત કર્મચારી પાણી નિકાલ માટે જોતરાયા
(વર્તમાન પ્રવાહ વાપી બ્યુરો)
વાપી, તા.19: બુધવારે વહેલી સવારે વાપીમાં સતત ચાર કલાક ધોધમાર પડેલા વરસાદે મુશ્કેલીઓનો પહાડ ખડકી દીધો હતો. કુદરતનો માર કંઈક ઓછો નહોતો તેમાં કોઈ ટિખળખોળ અવળચંડાએ વાપી રેલવે અંડરપાસ મેઈનમાં તાડપત્રી ખોસી દેતા જોતજોતામાં 5 થી 6 ફૂટ પાણી ભરાઈ ગયું હતું તેથી પૂર્વ-પﾍમિની અવર જવર સવાર સવારમાં જ ખોરવાઈ હતી.
વાપીમાં હાલમાં જૂનું અને નવું રેલવે ગરનાળું મુખ્ય અવર જવરનું માધ્યમ છે. તેમાં પણ અતિશય વરસાદ દરમિયાન નાળામાં પાણી ભરાઈ જતા હોય છે. આજે વરસાદ કરતા કોઈ માનવીય ચેષ્ઠાએ વાપીના હજારો લોકોને પારાવાર મુશ્કેલીમાં ધકેલી દીધા હતા. બન્યુ એમ હતું કે, કોઈ ટીખળખોરે વાપી મેઈન રેલ ગરનાળામાં જ્યાં પાણી જવાનો રસ્તો છે એમાં તાડપત્રી ખોસી દેતા પાણીઅટકી ગયું હતું. જોતજોતામાં નાળામાં 5 થી 6 ફૂટ પાણી ભરાઈ ગયું હતું. જેના નિકાલ માટે ડ્રેનેજ, વોટર સપ્લાય, ફાયર, ઈલેક્ટ્રીક વિભાગના પાલિકાના 40 ઉપરાંત કર્મચારી પાણી નિકાલની કામગીરીમાં જોતરાયા હતા.
