આરોપી રોશન અજીજ સૈયદ ઉ.વ.23 પોલીસ નાસિકથી ઊંચકી લાવી
(વર્તમાન પ્રવાહ વાપી બ્યુરો)
વાપી, તા.27: વાપી બલીઠા વિસ્તારમાંથી એક સગીરા ગુમ થયાની નોંધાયેલી ફરિયાદ બાદ પરિવારે અપહરણ થયાનું જણાવતા પોલીસે ચાંપતી તપાસ હાથ ધરી હતી. આરોપી વિધર્મી યુવકને પોલીસે નાસિકથી ઝડપી પાડયો હતો.
વાપી બલીઠા વિસ્તારમાં ગત તા.04 જુલાઈના રોડ એક 15 વર્ષિય સગીરા ઘરેથી ગુમ થઈ જતા પરિવારે અજાણ્યા વિરૂધ્ધ અપહરણની ફરિયાદ નોંધાવી હતી. ફરિયાદ બાદ પોલીસે તપાસના ચક્રો ગતિમાન કરેલા તે દરમિયાન તા.23જુલાઈના રોજ આરોપી રોશન અજીજ સૈયદ રહે.મહાકાલી મંદિર પાસે, નાસિક મહારાષ્ટ્રથી સગીરા સાથે પોલીસના હાથે ઝડપાઈ ગયો હતો. બન્નેને પોલીસ વાપી લઈ આવી હતી. સગીરાનું મેડિકલ તપાસ કરાવી તેના વાલીઓને સોંપાઈ હતી. બીજી તરફ વિધર્મી આરોપીએ સગીરા સાથે દુષ્કર્મ આચર્યાનું બહાર આવતા અપહરણ અને પોસ્કો તથા દુષ્કર્મનો ગુનો નોંધાયો છે.
