(વર્તમાન પ્રવાહ ન્યુઝ નેટવર્ક)
દમણ, તા.03: દમણ નગરપાલિકાના વોર્ડ નં.2ના કાઉન્સિલર શ્રી પ્રમોદભાઈ મોહનલાલ રાણાએ મોટી દમણની નવી શાકભાજી અને મચ્છી માર્કેટની બાજુમાં આવેલ ખાલી પ્લોટ ઉપર મોટી દમણના સર્વ સમાજ માટે કોમ્યુનીટિ હોલ અને નીચે પાર્કિંગ બનાવવા પ્રશાસક શ્રી પ્રફુલભાઈ પટેલ સમક્ષ માંગણી કરી છે.
શ્રી પ્રમોદભાઈ રાણાએ સંઘપ્રદેશના પ્રશાસકશ્રીને કરેલ રજૂઆતમાં જણાવ્યું છે કે, મોટી દમણ નગરપાલિકા વિસ્તારમાં ઘણાં લાંબા સમયથી સર્વ સમાજના લોકો દ્વારા ટાઉન હોલ બનાવવા માટે માંગણી થઈ રહી છે. મોટી દમણનો માર્કેટ વિસ્તાર દરેક ગામને મધ્યમાં પડે છે અને જગ્યાની ઉપલબ્ધતા પણ છે. તેથી ટાઉન હોલની સાથે અંડરગ્રાઉન્ડ પાર્કિંગ પણ બનાવવામાં આવે તો મોટી દમણની બંને માંગણીઓ પૂર્ણ થઈ શકે એવી લાગણી પણ વોર્ડ નં.2ના કાઉન્સિલર શ્રી પ્રમોદભાઈ રાણાએ પ્રગટ કરી છે.
