ગ્રામજનોએ અધિક કલેક્ટર પ્રાંત ધરમપુરને આવેદન પાઠવ્યું
(વર્તમાન પ્રવાહ વાપી બ્યુરો)
વાપી, તા.25: ધરમપુર-કપરાડા અંતરિયાળ વિસ્તારોમાં ખ્રિસ્તી મિશનરીઓ દ્વારા ચાલી રહેલી પ્રવૃત્તિઓ અંગે ભૂતકાળમાં જોવા મળી હતી તેવી પ્રવૃત્તિ અંતર્ગત ધરમપુર તાલુકાના ચાર ગામોમાં સરકારી જમીનમાં ક્રોસ લગાવીને ચર્ચા બનાવવાની થઈ રહેલી કામગીરીનો ગ્રામવાસીઓએ વિરોધ કરીને આજે ધરમપુર અધિક કલેક્ટર પ્રાંતને આવેદનપત્ર પાઠવ્યું હતું.
ધરમપુર તાલુકાના મોટી કોરવળના સુલીયા ડુંગર ઉપર, કપરાડા તાલુકાના પેંઢારદેવીના ડુંગર ઉપર, કપરાડાના વડોલી સીમખડક ફળીયામાં ડુંગર ઉપર તથા કપરાડાના માંડવા ગામે ખ્રિસ્તી મિશનરીઓ દ્વારા સરકારી જમીનનો ગેરકાયદે કબજો કરીને મોટા મોટા ક્રોસ લગાવીને ચર્ચ બનાવવાની હિલચાલ કરી રહેલ છે. સ્થાનિક આદિવાસીઓનેગેરકાયદેસર ધર્માતરણના ઈરાદાથી સુંદર પ્રકૃતિ ધરાવતા ડુંગરો ઉપર ગેરકાયદે કબજો કરી ક્રોસ લગાવાની ગેરકાયદે પ્રવૃત્તિ-હિલચાલ ચાલું થઈ છે. જેની સામે કાયદેસરની કાર્યવાહી કરવાની માંગણી સાથે ધરમપુર પ્રાંતમાં સ્થાનિક અગ્રણીઓએ આવેદનપત્ર પાઠવ્યું હતું.
