સમસ્ત મેઘવાળ ગામમાં આનંદ-ઉલ્લાસનું વાતાવરણઃ મેઘવાળનો નદી કિનારો સંઘપ્રદેશ પ્રશાસન માટે પ્રવાસનનું નજરાણું તરીકે વિકસિત કરવાની મળશે તક
(વર્તમાન પ્રવાહ ન્યુઝ નેટવર્ક)
ગાંધીનગર, તા.29 : સોમવારે ગાંધીનગર ખાતે કેન્દ્રિય ગૃહ અને સહકારિતા મંત્રી શ્રી અમિતભાઈ શાહના અધ્યક્ષ સ્થાને મળેલી વેસ્ટર્ન ઝોનલ કાઉન્સિલની બેઠકમાં દાદરા નગર હવેલીને અડીને આવેલ ગુજરાત રાજ્યના કપરાડા તાલુકાના મેઘવાળ ગામને સંઘપ્રદેશમાં સામેલ કરવાનો નિર્ણયનો સૈધ્ધાંતિક સ્વીકાર કરાયોછે. જેના કારણે વર્ષોથી ઉપેક્ષિત મેઘવાળ ગામનું ભાગ્ય ઉઘડી ગયું હોવાની લાગણી પ્રગટ થઈ રહી છે.
સોમવારે યોજાયેલ બેઠકમાં ગુજરાત રાજ્યના દાદરા નગર હવેલીની અડોશપડોશમાં આવેલ નગર, રાયમાળ અને મધુબન ગામોને જોડવાનો પણ પ્રસ્તાવ હતો. પરંતુ દક્ષિણ ગુજરાતના આ ત્રણેય ગામો દમણગંગા જળાશય પ્રોજેક્ટ અંતર્ગત સુરક્ષિત હોવાથી તેના હસ્તાંતરણ માટે સમજૂતિ શક્ય નહીં બની હતી. પરંતુ દાદરા નગર હવેલીના મસાટ નજીક આવેલ મેઘવાળ ગામને સંઘપ્રદેશમાં સમાવવા માટે સૈધ્ધાંતિક સહમતિ બનતાં આ વિસ્તારમાં વિકાસના નવા દરવાજા ઉઘડશે એવી લાગણી લોકોમાં પ્રગટ થઈ રહી છે.