ઓલમ્પિક રમતો અને પારંપરિક રમતો જેવી કે કબડ્ડી,
ખો-ખો, યોગાસન, મલખમ રમતો માન્ય ગણાશે
(વર્તમાન પ્રવાહ ન્યુઝનેટવર્ક)
વલસાડ, તા. 01: રાજ્યના જે રમતવીરોએ રમત ગમત ક્ષેત્રે નોંધપાત્ર ફાળો આપ્યો હોય અને જેઓ આર્થિક રીતે નિ:સહાય હોય તેવા રમતવીરોને પેન્શન આપવાની યોજના ગાંધીનગર સ્પોર્ટસ ઓથોરીટી ઓફ ગુજરાત દ્વારા અમલમાં છે. આ યોજનાનો લાભ મેળવવા માટે રમતવીર ગુજરાતના વતની હોવા જોઇએ તેમજ ૫૦ વર્ષથી વધુ ઉંમરના હોવા જરૂરી છે. પોતાની કારકિર્દી દરમ્યાન રમત ગમત ક્ષેત્રે રાષ્ટ્રીયકક્ષાએ વ્યક્તિગત કે સાંધિક રમતમાં ગોલ્ડ, સિલ્વર કે બ્રોન્ઝ મેડલ મેળવેલો હોય કે રાજ્ય તરફથી નેશનલ માટે મોકલાવેલી ટીમના સભ્ય હોય તેવા રમતવીરોને પાત્ર ગણવામાં આવશે. નિવૃત રમતવીરે યુવાન વયે પોતાની કારકિર્દી દરમ્યાન ૩૫ વર્ષની ઉંમર સુધી રાજ્યનું પ્રતિનિધિત્વ કરી રાષ્ટ્રીયકક્ષાએ રમતોમાં ભાગ લઇ પદ પ્રાપ્ત કરી રાજ્ય અને રાષ્ટ્રનું ગૌરવ વધારી રમતોમાં ભાગ લીધો હોય તેવા ખેલાડીઓને આ યોજના માટે પાત્ર ગણવામાં આવશે. આ રમતો સરકારશ્રી દ્વારા યોજવામાં આવતી હોય તથા રાજ્ય અને રાષ્ટ્રકક્ષાના માન્ય ફેડરેશન દ્વારા જે-તે સમયે યોજવામાં આવી હોય તેવી જે-તે સમયની તમામ ઓલમ્પિક રમતો અને પારંપરિક રમતો જેવી કે કબડ્ડી, ખો-ખો, યોગાસન, મલખમ રમતોને પણ માન્ય ગણવામાં આવશે.
આ યોજના અન્વયે પાત્રતા ધરાવતા રમતવીરને આવકની કોઇ મર્યાદા વગર તેઓને માસિક રૂ.૩૦૦૦/-(ત્રણ હજાર પુરા)ની રકમ માસિક ધોરણે પેન્શન રૂપે ચુકવવામાં આવશે. આ યોજના અંતર્ગત વલસાડ જિલ્લાના પાત્રતા ધરાવતા નિવૃત રમતવીરો જિલ્લા રમત ગમત અધિકારીશ્રી, જિલ્લા રમત ગમત કચેરી, ૧૦૬, પહેલા માળે, જૂની બી.એસ.એન.એલ.કચેરી, હાલર રોડ, વલસાડ કચેરી સમય દરમ્યાન અરજી ફોર્મ મેળવી તા.૧૫/૦૯/૨૦૨૩ સુધીમાં ડોમીસાઇલ પ્રમાણપત્ર, રમતક્ષેત્રે મેળવેલી સિધ્ધિઓના પ્રમાણપત્રોની નકલ અને જરૂરી આધાર-પુરાવા સાથે અરજી બે નકલમાં રૂબરૂ પહોંચાડવાની રહેશે. સમય મર્યાદા બહાર આવેલી અરજીઓ અમાન્ય ગણવામાં આવશે. વધુ માહિતી માટે કચેરીનો સંપર્ક કરવાનો રહેશે.