ટ્રાફિક સંકલનની મિટિંગમાં નક્કી કરાયા મુજબ કાર્યવાહી :
પોલીસની હાજરીમાં દબાણો દૂર કરાયા
(વર્તમાન પ્રવાહ વાપી બ્યુરો)
વાપી, તા.12: વાપી નોટિફાઈડ એરિયા ઓથોરિટી દ્વારા જીઆઈડીસી ટાઉનશીપ ગુંજન વિસ્તારમાં મેગા ડિમોલિશનની કાર્યવાહી હાથ ધરાઈ હતી. જેમાં 50 ઉપરાંત દબાણો હટાવાયા હતા.
વાપી જીઆઈડીસી ગુંજન વિસ્તાર મેઈન રોડ, અંબામાતા સર્કલ, મોરારજી દેસાઈ સર્કલ, હરિયા હોસ્પિટલ રોડ તથા ખાઉધરી ગલી જેવા વિસ્તારોમાં નોટિફાઈડનો હથોડો પડયો હતો. જાહેર માર્ગમાં ટ્રાફિકને અડચણ રૂપ લારી ગલ્લા, કાચા કેબિન જેવા દબાણો વીણી વીણીને દૂર કરવામાં આવ્યા હતા. નોટિફાઈડ ચીફ ઓફિસર સગર અને અન્ય અધિકારી જી.આઈ.ડી.સી. પોલીસ કાફલાની નિગરાનીમાં એક પછી એક રોડો ઉપરથી દૂર કરાયા હતા. ઉલ્લેખનીય છે કે, તાજેતરમાં વી.આઈ.એ.માં યોજાયેલ ટ્રાફિક સંકલનની મિટિંગમાં દબાણો હટાવવાનો લેવાયેલા નિર્ણય મુજબ ગણતરીની દિવસોમાં તંત્રએ કામગીરી પાર પાડી હતી. ગુંજન વિસ્તાર સામાન્ય રીતે ભરચક વિસ્તાર છે તેથી દબાણો ટ્રાફિક અડચણરૂપ જ હતા.
