સેલવાસના આલોકકુમાર વિરૂધ્ધ નોંધાયેલ ફરિયાદ બાદ ધરપકડ થઈ
(વર્તમાન પ્રવાહ વાપી બ્યુરો)
વાપી, તા.26: વાપીની ઈન્ડિયન બેંકમાં આસિસ્ટન મેનેજરને એ.ટી.એમ.ની સંભાળ રાખવાની ફરજ સોંપાઈ હતી તે દરમિયાન અલગ અલગ સમયે એ.ટી.એમ.માંથી રૂપિયા 15.26 લાખની ઉચાપત કર્યાનું તપાસમાં બહાર આવતા ફરિયાદ નોંધાઈ હતી. પોલીસે ધરપકડ કરી વધુ તપાસ હાથ ધરી છે.
સેલવાસમાં રહેતો આ લોકકુમાર સિંહ વાપી ઈન્ડિયન બેંકમાં આસિસ્ટન મેનેજર તરીકે ફરજ બજાવતો હતો. બેંકએ એ.ટી.એમ.ની સંભાળ રાખવાની ફરજ સોંપી હતી. તેમજ પાસવર્ડ પણ તેને આપવામાં આવ્યા હતા. થોડા સમય બાદ બેંક મેનેજર દિલીપકુમાર મિશ્રાએ એ.ટી.એમ.નો હિસાબ ચેક કરતા બરાબર જણાયેલો નહી તેથી બેંકના સી.સી.ટી.વી. ફુટેજ ચેક કરવામાં આવ્યા હતા. તેમાં આલોક કુમાર એ.ટી.એમ.માંથી પૈસા કાઢતો જણાયેલ તેથી મેનેજરએ હિસાબ કરતા કેશમાંથી રૂા.15.26 ની ઉચાપત થયેલી જણાતા મેનેજરે ઉદ્યોગનગર પોલીસમાં ફરિયાદ નોંધાવી હતી. પોલીસે આરોપી આલોકની ધરપકડ કરી વધુ તપાસ હાથ ધરી છે.