(વર્તમાન પ્રવાહ ન્યુઝ નેટવર્ક)
પારડી, તા.08: સમગ્ર ગુજરાત રાજ્યના શહેરી વિસ્તારના રહેવાસીઓ રખડતા ઢોરની સમસ્યાનો સામનો કરી રહ્યા છે. શહેરોમાં રખડતા ઢોર ગંભીર, જોખમી બન્યા છે. રખડતા ઢોરથી થતા અકસ્માતોને કારણે ઘણાં લોકોને ઈજા પહોંચી છે અને જાન પણ ગુમાવ્યા છે. આ સમસ્યાને હળવી કરવા માટે, ગુજરાત રાજ્યના શહેરી વિસ્તારોમાં ઢોરના લાઈસન્સ આપવાનું પણ નક્કી કરવામાં આવ્યું છે.
આ ઉપરાંત હાલ મહાનગરપાલિકા અને નગરપાલિકા વિસ્તારમાં ઢોરોનો ત્રાસ અટકાવવા માટે રખડતા ઢોરો પકડવાની તથા નક્કી થયેલ દંડ ભરી પશુ માલિકોને પરત સોંપવાની કાર્યવાહી મહાનગરપાલિકા અને નગરપાલિકા દ્વારા હાથ ધરવામાં આવી છે.
પારડી નગરપાલિકા દ્વારા પણ આ હુકમને લઈ ઢોરો પકડવાનું અભિયાન વહીવટદાર આર.આર. ચૌધરી, ચીફ ઓફિસર બી.બી.ભાવસાર, સેનેટરી ઈન્સ્પેક્ટર ભાવેશ પટેલ તથા સુપરવાઈઝર પંકજ ગરાણીયા અને પાલિકાના કર્મચારીઓ દ્વારા ઢોરોપકડવાનું અભિયાન આજરોજ શરૂ કરવામાં આવ્યું હતું. જેમાં પારડી વિસ્તારમાંથી સાત જેટલા ઢોરો પકડી ડુંગળી વાત્સલ્ય ગૌશાળા ખાતે લઈ જવાયા હતા. જેતે ઢોર માલિકો ડુંગરી વાત્સલ્ય ગૌ શાળા થી યોગ્ય દંડ ભરી પોતાના ઢોરો છોડાવી શકે છે.