(વર્તમાન પ્રવાહ ન્યુઝ નેટવર્ક)
સેલવાસ, તા.27 : કેન્દ્ર શાસિત પ્રદેશ દાદરા નગર હવેલીના દાદરા ગામને અડીને આવેલા ગુજરાતના વલસાડ જિલ્લાના વાપીના લવાછા ગામ સ્થિત શ્રી રામેશ્વર મહાદેવ મંદિર ખાતે સમસ્ત હિન્દુ સંગઠન (અખંડ ભારત) દ્વારા ભવ્ય દીપ મહોત્સવનું આયોજન કરવામાં આવ્યું હતું. જેમાં દેવ દિવાળીના પાવન પર્વએ આજે પ્રથમ વખત એક લાખ અગિયાર હજાર એકસો અગિયાર દિવાપ્રગટાવાયા હતા. અહીં ગત વર્ષે પણ હિન્દુ સંગઠન દ્વારા દેવ દિવાળીની ઉજવણી કરવામાં આવી હતી. જેમાં અગિયાર હજાર દીપ પ્રજ્વવલિત કરવામાં આવ્યા હતા.
લવાછાના ખાતેના પૌરાણિક રામેશ્વર મહાદેવ મંદિરે સમસ્ત હિન્દુ સંગઠન દ્વારા આયોજીત આ પર્વની ઉજવણીમાં સાધુ-સંતો-મહંતો સહિત મહિલા, વડીલો અને બાળકો સહિત તમામ શ્રદ્ધાળુઓએ દીપ પ્રગટાવવા સાથે મહાદેવને પણ જળાભિષેક કર્યો હતો. દરમિયાન ભગવાન શ્રીરામની મૂર્તિની સુંદર રંગોળી પણ પાડવામાં આવી હતી. આ કાર્યક્રમમાં હિન્દુ સંગઠનના પ્રતિનિધિઓ સહિત લવાછા, વાપી, દાદરા અને સેલવાસથી મોટી સંખ્યામાં ભાવિકોએ લાભ લીધો હતો.