(વર્તમાન પ્રવાહ ન્યુઝ નેટવર્ક)
સેલવાસ, તા.29 : ગુજરાતના વલસાડ જિલ્લાને અડીને આવેલા કેન્દ્ર શાસિત પ્રદેશ દાદરા નગર હવેલીમાં આવેલ આર.આર.કેબલના ત્રણ પ્લાન્ટમાં ઈન્કમ ટેક્સ(આઈ.ટી.) વિભાગે આજે સર્ચ ઓપરેશન હાથ ધર્યું હતું.
પ્રાપ્ત માહિતી મુજબ ગુજરાત અને દાદરા નગર હવેલીમાં ફરીવાર ઈન્કમ ટેક્સ વિભાગે સર્ચ ઓપરેશન શરૂ કર્યું હતું. જેમાં આર.આર.કેબલ ગ્રુપના દરેક પ્લાન્ટ અને ઓફિસોમાં આઇ.ટી.ના અધિકારીઓએ ગુજરાત પોલીસની ટીમ સાથે વહેલી સવારથી જ ધામા નાખ્યા હતા અને મુંબઈ સહિત અમદાવાદ, વડોદરા, સુરત અને સેલવાસમાં લગભગ 40થી વધુ સ્થળે સર્ચ ઓપરેશન કર્યું હતું.
આઇ.ટી. વિભાગના અધિકારીઓએ કેન્દ્ર શાસિત પ્રદેશ દાદરા નગર હવેલીમાં રખોલી ગામમાં બે પ્લાન્ટ અને દાદરામાં એક પ્લાન્ટમાં ગુજરાત પોલીસની ટીમ સાથે હાથ ધરેલા સર્ચ ઓપરેશન દરમિયાન કંપનીના દસ્તાવેજ, કોમ્પ્યુટર અને હાર્ડડિસ્કની તપાસ કરી હતી. તેમજ તમામ કર્મચારીઓના મોબાઈલ પણ જપ્ત કરવામાં આવ્યા હતા. સાથે ગ્રુપના ચેરમેનને ત્યાં પણ તપાસ થઈ રહી છે અને ડિરેક્ટરો તેમજ ડિસ્ટ્રીબ્યુટરોને ત્યાં તપાસ હાથ ધરાઈહોવાની માહિતી મળી છે. જેમાં મોટી કરચોરી બહાર આવે તેવી શક્યતા જોવાઈ રહી છે. આઇ.ટી. વિભાગ દ્વારા અલગ અલગ ટીમ બનાવી એક સાથે 40થી વધુ જગ્યાઓ પર એકસાથે સર્ચ ઓપરેશન હાથ ધરવામાં આવતાં પ્રદેશના અન્ય એકમોમાં પણ ફફડાટ ફેલાઈ જવા પામ્યો છે.