અબ્રામાથી દરરોજ આરતીબેન વિજયભાઈ હળપતિ પારડી
હોસ્પિટલમાં નોકરી જતી હતી
(વર્તમાન પ્રવાહ વાપી બ્યુરો)
વાપી, તા.12: વલસાડ નજીક મુકુંદ ઓવરબ્રિજ પાસે આજે સવારે ગંભીર અકસ્માત સર્જાયો હતો. અબ્રામાથી નિકળી યુવતિ મોપેડઉપર પારડી હોસ્પિટલમાં નોકરી પર જઈ રહી હતી ત્યારે મુકુંદ ઓવરબ્રિજ ઉપર એક કન્ટેનરે મોપેડને ટક્કર મારી દેતા યુવતિનું ઘટના સ્થળે કમકમાટી ભર્યું મોત નિપજ્યું હતું.
કરુણ અકસ્માતની પ્રાપ્ત વિગતો મુજબ વલસાડ અબ્રામામાં રહેતી 22 વર્ષિય યુવતિ આરતીબેન વિજયભાઈ હળપતિ નિત્યક્રમ મુજબ આજે સવારે મોપેડ નંબર જીજે 15 ડીએન 2878 ઉપર સવાર થઈ પારડી હોસ્પિટલમાં નોકરી પર જવા નિકળી હતી. પરંતુ કિસ્મતને કંઈક અલગ મંજુર હશે. મોપેડ હાઈવે મુકુંદ ઓવરબ્રિજ ઉપર પસાર થઈ રહ્યું હતું ત્યારે એક અજાણ્યા કન્ટેનર ચાલકે મોપેડને ટક્કર મારી દેતા ગમખ્વાર અકસ્માત સર્જાયો હતો. અકસ્માતમાં આશાસ્પદ આરતીબેન ગંભીર રીતે ઘાયલ થતા ઘટના સ્થળે જ કમકમાટીભર્યુ મોત નિપજ્યું હતું. પોલીસે સ્થળ ઉપર પહોંચી આગળની કાર્યવાહી હાથ ધરી હતી.