યુર્વિ માર્કેટીંગ નામના ગોડાઉનમાં આગ લાગતા સરસામાન બળીને ખાખ થઈ ગયો
(વર્તમાન પ્રવાહ વાપી બ્યુરો)
વાપી, તા.23: વાપી જી.આઈ.ડી.સી. સેકન્ડ ફેઝમાં કાર્યરત એક ભંગારના ગોડાઉનમાં ભિષણ આગ લાગતા અફરા તફરી મચી જવા પામી હતી.
વાપીમાં છાશવારે એક પછી એક ભંગારના ગોડાઉનોમાં આગ લાગવી એ હવે સામાન્ય ઘટના તંત્રને લાગી રહી છે. કારણ કે જરૂરી કોઈ કાયદાકીય પગલા બેફામ ધમધમતા ભંગારના ગોડાઉનો ઉપર ભરાતા નથી તેવો વધુ એક આગનો બનાવ વાપી જીઆઈડીસી સેકન્ડ ફેઝમાં કાર્યરત ઉર્વિ માર્કેટીંગ નામના ગોડાઉનમાં બન્યો હતો. ગોડાઉનમાં પ્લાસ્ટીક અને જ્વલનશીલ સરસામાન ભરેલો હોવાથી આગે જોતજોતામાં ભિષણ રૂપ ધારણ કર્યું હતું. આખું ગોડાઉન આગની લપેટોમાં આવી જતા તમામ માલ સામાન બળીને ખાખ થઈ ગયો હતો. આગના ધુમાડા ઊંચે સુધઈ ફેલાયા હતા. આગની ઘટનાની જાણ થતા નોટીફાઈડ ફાયર બ્રિગેડ ઘટના સ્થળે પહોંચી આગ ઉપર કાબુ મેળવ્યો હતો. આગમાં અન્ય કોઈ જાનહાની થવા પામી નહોતી. આગ લાગવાનું કારણ બહાર આવ્યું નથી.
