સેમિફાઈનલમાં હરિયાણાના બોક્સરે દાનહ અને દમણ-દીવના બોક્સર સુમિતને 3-2થી આપેલી હાર
(વર્તમાન પ્રવાહ ન્યુઝ નેટવર્ક)
દમણ, તા.24 : તમિલનાડુમાં ચાલી રહેલી ખેલો ઈન્ડિયા યૂથ ગેમ્સમાં કેન્દ્ર શાસિત પ્રદેશ દાદરા નગર હવેલી અને દમણ-દીવનું નેતૃત્વ કરતા બોક્સર શ્રી સુમીતે પોતાનું સર્વશ્રેષ્ઠ પ્રદર્શન કર્યું હતું અને બોક્સિંગમાં બ્રોન્ઝ મેડલ જીતવામાં સફળતા મેળવી હતી.
પ્રાપ્ત માહિતી પ્રમાણે કેન્દ્ર શાસિત પ્રદેશ દાદરા નગર હવેલી અને દમણ-દીવના બોક્સર શ્રી સુમિતે 63 – 67 કિગ્રા વજન વર્ગની વ્યક્તિગત સ્પર્ધામાં પોતાનું શાનદાર પ્રદર્શન કર્યું અને કેન્દ્ર શાસિત પ્રદેશ માટે પ્રથમ મેડલ જીત્યો હતો.
તમિલનાડુના વિવિધ 4 જેટલા શહેરોમાં રમાઈ રહેલા ‘ખેલો ઈન્ડિયા યૂથ ગેમ્સ’માં વિવિધ રાજ્યોના 1200થી વધુ રાષ્ટ્રીય સ્તરના ખેલાડીઓએ ભાગ લીધો હતો, જેમાં સંઘપ્રદેશ થ્રીડીના બોક્સર શ્રી સુમિતે અનુભવી બોક્સરોને હરાવીને આ સ્થાન હાંસલ કર્યું છે. સેમિફાઇનલમાં કપરા મુકાબલામાં હરિયાણાના બોક્સરે શ્રી સુમિતને 3-2થી હરાવ્યો હતો અને આમ, શ્રી સુમિતને બ્રોન્ઝ મેડલથી સંતોષ માનવો પડયો હતો. આ મેચ પહેલાં ક્વાર્ટરફાઇનલમાં શ્રી સુમિતે મણિપુરના બોક્સરને 5-0ના મોટા માર્જીનથી હરાવ્યો હતો. શ્રેષ્ઠ પ્રદર્શનથી શ્રી સુમિતે પોતાની સાથે સાથે સંઘપ્રદેશનું નામ પણ રોશન કર્યું છે. આ સાથે શ્રી સુમિતે ‘ખેલો ઈન્ડિયા યૂથ ગેમ્સ’માં બે પદક જીત્યા છે જે સંઘપ્રદેશ માટે ગૌરવની બાબત છે.
સંઘપ્રદેશને પહેલો પદક અપાવનારા શ્રી સુમિતના શ્રેષ્ઠ દેખાવ બદલ સંઘપ્રદેશના રમતગમત અને યુવા બાબતોના સચિવ ડૉ. અરૂણ ટી અને નિર્દેશક શ્રી અરૂણ ગુપ્તાએ બોક્સિંગ અભિનંદન આપ્યા હતા સાથે કોચ શ્રી વિજય પહલ અને મિશન અધ્યક્ષ શ્રી અક્ષય કોટલવારને પણ શુભકામના પાઠવી હતી.
