(વર્તમાન પ્રવાહ ન્યુઝ નેટવર્ક)
સેલવાસ, તા.21 : દાદરા નગર હવેલીના નરોલી ગામની કંપનીમાં કામ કરતા કર્મચારી ચાલતા ચાલતા કનાડી ફાટક નજીક ગટરમાં પડી જતા ગંભીર ઇજા થતાં સારવાર દરમ્યાન મોત થયું છે.
પ્રાપ્ત માહિતીપ્રમાણે અભયરામ યાદવ (ઉ.વ.46) રહેવાસી કનાડી ફાટક, નરોલી. મૂળ રહેવાસી-દેવરિયા જિલ્લો, ઉત્તર પ્રદેશ. જેઓ શ્રી સાંઈ એન્ટરપ્રાઇઝ એજન્સી મારફત ભીલોસા કંપનીમાં છેલ્લા ત્રણ મહિનાથી કામદાર તરીકે નોકરી કરતા હતા. જેઓ ગત 09 ફેબ્રુઆરીના રોજ એમના પરિવારને પૈસા મોકલાવવા માટે કનાડી ફાટક પાસે એક દુકાન પર ગયા હતા. ત્યારબાદ એના પરિવાર સાથે ફોન પર વાતો પણ કરી હતી અને તેઓ રૂમ તરફ જઈ રહ્યા હતા તે સમયે અચાનક ગટરમાં પડી જતાં ગંભીર ઇજાઓ થઈ હતી. અભયરામને પડેલા જોઈ આજુબાજુના લોકો દોડી આવ્યા હતા અને 108 એમ્બ્યુલન્સ બોલાવી સારવાર અર્થે સિવિલ હોસ્પિટલમાં લઇ જવામાં આવ્યા હતા. જ્યાં ગંભીર ઇજા હોવાને કારણે આઈસીયુમાં દાખલ કરવામાં આવ્યા હતા. પરંતુ સારવાર દરમ્યાન અભયરામ યાદવનું મોત થયું હતું. આ ઘટના અંગેની ફરિયાદ નોંધી વધુ તપાસ સેલવાસ પોલીસ કરી રહી છે.
