(વર્તમાન પ્રવાહ ન્યુઝ નેટવર્ક)
પારડી, તા.10: આગામી રમઝાન ઈદ અને રામનવમીના તહેવારને ધ્યાનમાં રાખીને પારડી પોલીસ સ્ટેશન ખાતે પી.આઈ. જી.આર. ગઢવીની અધ્યક્ષતામાં શાંતિ સમિતિની બેઠકનું આયોજન કરાયું હતુ. જેમાંપોલીસ દ્વારા તહેવારોની કોમી એખલાસની ભાવના તથા શાંતિપૂર્ણ માહોલ સાથે ઉજવણી કરવા અપીલ કરાઈ હતી. ઉપરાંત તહેવારમાં કાયદો અને વ્યવસ્થા જળવાઈ રહે તથા કોઇ અનિચ્છનીય બનાવ ન બને માટે જરૂરી સૂચના સાથે માર્ગદર્શન આપ્યું હતું.
પારડી પોલીસ સ્ટેશન ખાતે પી.આઈ જી.આર.ગઢવી ની અધ્યક્ષતામાં શાંતિ સમિતિની બેઠકનું બુધવાર 10.4.2024 ના રોજ આયોજન કરવામાં આવ્યું હતું. જેમાં પારડીના પ્રેમલ ચૌહાણ, જિગ્નેશ પટેલ, અનવર મણિયાર, ઇમોદ્દીન સૈયદ, કોલકના અઝીઝભાઈ કોલકર, સહિતના આગેવાનો ઉપસ્થિત રહ્યા હતા. આ બેઠકમાં રમઝાન ઈદ સહિત રામનવમીના તહેવારો શાંતિપૂર્ણ માહોલમાં કરવામાં આવે અને કોમી એકતાનું ઉદાહરણ પારડીમાં કાયમ બની રહે તેમજ કોઈ અશાંતિ ડહોળાય નહિ અને આચારસંહિતા લાગુ હોવાથી કોઈ નાના મોટા બનાવ ન બને તે માટે પણ સૂચન કરવામાં આવ્યું હતું. આ સાથે રામનવમી તેમજ રમઝાન ઇદ ના તહેવારને અનુસંધાને જરૂરી માર્ગદર્શન અને સુચના આપવામાં આવી હતી. અને સોશિયલ મીડિયાની ખોટી અફવાઓથી દૂર રહેવા સમજ કરાઈ હતી.
