(વર્તમાન પ્રવાહ વાપી બ્યુરો)
વાપી, તા.22: વાપી વિસ્તારમાં ધમધમતા ભંગારના ગોડાઉનોમાં આગ લાગવી સામાન્ય વાત બની ચૂકી છે. છાશવારે ડુંગરી ફળીયા, કરવડ, ડુંગરા-સલવાવ જેવા વિસ્તારોના ભંગારના ગોડાઉનોમાં સતત આગના બનાવો બનતા રહે છે. તેવો વધુ એક બનાવ આજે સોમવારે બપોરે કરવડ ગામે કાર્યરત એક ભંગારના ગોડાઉનમાં આગ લાગતા અફરા તફરી મચી જવા પામી હતી.
વાપી કરવડ ગામે પંચાયતની અમી દ્રષ્ટિ હેઠળ ભંગારના ગોડાઉનો બેરોકટોક ચાલી રહ્યા છે જે ભવિષ્યમાં કોઈ મોટી હોનારતને આમંત્રે તો નવાઈ નહી. આજે બપોરે ગેરકાયદે ધમધમતા કરવડના એક ભંગાર ગોડાઉનમાં ભિષણ આગ ભભૂકી ઉઠી હતી. કિલોમીટરો સુધી જ્વાળાઓ દૃશ્યમાન થતી હતી. ધુવાડાથી ચારે તરફ ગુંગળામણ ફેલાઈ ગઈ હતી. ફાયર બ્રિગેડની ટીમે ઘટના સ્થળે પહોંચી આગને બુઝાવવાની કવાયત કલાકો સુધી હાથ ધરી હતી. જો કે બનાવમાં કોઈ જાનહાની થવા પામી નથી તેમજ આગ લાગવાનું કારણ અકબંધ રહ્યું છે.
