નાનાપોંઢા, ચિવલ, ધોધડકુવા અને બાલચોંઢી ચાર ગામમાં ચેકડેમથી સિંચાઈ થતી હતી તે બંધ થઈ ગઈ
(વર્તમાન પ્રવાહ વાપી બ્યુરો)
વાપી, તા.27: નાનાપોંઢા હદમાં આવેલ કોલક નદી ઉપર મહત્ત્વાકાંક્ષી ચેકડેમ બનાવવામાં આવ્યો હતો. સ્થાનિક પાણીની જરૂરીયાત અને સિંચાઈ માટે બનાવાયેલ આ ચેકના 33 પૈકી 32 દરવાજા ગાયબ થઈ ગયા છે તેથી ચેકડેમ ખંડેર બની ગયો છે. આ અંગે તંત્ર તરફથી કોઈ સગડ કે કાર્યવાહી કરવામાં આવી નથી તે પણ મોટું અચરજ ઘટના પેદા કરી રહેલ છે.
નાનાપોંઢા પાસેથી વહેતી કોલક નદી ઉપર ચિવલના ધોલ ફળીયા અને પહેલાદ ફળીયાને જોડતો એક ચેકડેમબનાવાયો હતો. સિંચાઈ અને સ્થાનિક પાણીની જરૂરીયાત ચેકડેમ થકી પુરી થતી હતી. ચેકડેમ માટે 33 દરવાજા હતા. આ 33 દરવાજા પૈકી 32 દરવાજા ક્રમશઃ ચોરી થઈ ગયા છે તેથી યોજના આખી નિષ્ફળ ગઈ છે અને ચેકડેમ ખંડેર બની ગયો છે. ચેકડેમની સ્થિતિ હાડપિંજર જેવી બની ગઈ છે. 32-32 દરવાજા ચોરાઈ ગયા પણ તંત્રએ એની નોંધ સુધી લીધી હોય તેવું જોવા મળતું નથી. જાહેર યોજનાની જાળવણી અને સંચાલન અંગેની અક્ષમ્ય પરિસ્થિતિ ઉભી થઈ ચૂકી છે.
