દાદરા નગર હવેલી અને દમણ-દીવમાં મત ગણતરી માટે ચૂંટણી વિભાગ સજ્જઃ મત ગણતરી દરમિયાન કોઈ અનિચ્છનીય બનાવ નહીં બને તે માટે જિલ્લા પ્રશાસન પણ સતર્ક
(વર્તમાન પ્રવાહ ન્યુઝ નેટવર્ક)
દમણ, તા.02 : સંઘપ્રદેશ દાદરા નગર હવેલી અને દમણ-દીવની બે લોકસભા બેઠક માટેની મત ગણતરી 4થી જૂનના રોજ સવારે 8:00 વાગ્યાથી ત્રણેય જિલ્લામાં શરૂ થશે. આજે સંઘપ્રદેશના ચીફ ઈલેક્ટોરોલ ઓફિસર શ્રી ટી. અરૂણે જાણકારી આપતાં જણાવ્યું હતું કે, લોકસભાની દમણ અને દીવ બેઠક માટેની મત ગણતરી દમણ અને દીવ બે સ્થાને કરાશે. જ્યારે દાદરા નગર હવેલીમાં એક જ સ્થાને મત ગણતરી આટોપવામાં આવશે.
દમણ ખાતે 12 ટેબલમાં 9 રાઉન્ડ, દાદરા નગર હવેલી 14 ટેબલમાં 23 રાઉન્ડ અને દીવ ખાતે 10 ટેબલમાં 5 રાઉન્ડ દરમિયાન મત ગણતરી સંપન્ન કરાશે.
આગામી તા.4થી જૂનના રોજ સવારે 8 વાગ્યાથી શરૂ થનારી મત ગણતરી દરમિયાન સૌથી પહેલાં પોસ્ટલ બેલેટની ગણતરી કરવામાં આવશે. ત્યારબાદ ઈવીએમના મતોની ગણતરી થશે.
લોકસભાની દમણ અને દીવ બેઠકનું પરિણામ બપોરના 12:30 વાગ્યા સુધી જાહેર થવાની સંભાવના છે. જ્યારે દાદરા નગર હવેલીબેઠકનું પરિણામ બપોરના 2:00 વાગ્યા સુધી બહાર પડવાની ધારણા વ્યક્ત થઈ રહી છે.
મત ગણતરી દરમિયાન કોઈપણ પ્રકારની અનિચ્છનીય ઘટના નહીં બને તે માટે પ્રદેશ પ્રશાસન સતર્ક બની કામ કરી રહ્યું છે અને પરિણામની ઘોષણા બાદ લોકસભાની દાદરા નગર હવેલી અને દમણ-દીવ બેઠક કઈ તરફ વળી છે તેની સ્પષ્ટતા પણ થઈ જશે.
