(વર્તમાન પ્રવાહ ન્યુઝ નેટવર્ક)
સેલવાસ, તા.18: સેલવાસના ડોકમરડી ફલાયઓવર બ્રિજ નજીક રીંગ રોડ પર ટ્રક દ્વારા સાયકલ સવારને ટક્કર મારવાને કારણે સાયકલ સવારનું ઘટના સ્થળ પર જ મોત થયું હતું.
પ્રાપ્ત વિગત અનુસાર શંકર રામ (ઉ.વ.40) રહેવાસી- ડોકમરડી સેલવાસ. જેઓ સિક્યુરીટી ગાર્ડ તરીકે નોકરી કરે છે, જેમની નોકરીનો સમય પૂરો થતાં નોકરી પરથી ઘરે પરત જવા સાયકલ પર નીકળ્યા હતા તે સમયે રીંગ રોડ પર પૂરઝડપે આવી રહેલ ટ્રકના ચાલકે જોરદાર ટક્કર મારતા સાયકલ સાથે શંકર નીચે પટકાયો હતો. જેના કારણે તેના માથા અને શરીરના ભાગે ગંભીર ઈજાઓ થઈ હતી. ગંભીર રીતે ઈજાગ્રસ્ત સાયકલ સવાર શંકર રામનું ઘટના સ્થળ ઉપર જ કમકમાટીભર્યું મોત થતાં ચકચાર ફેલાઈ હતી.
ઘટનાની જાણ સેલવાસ પોલીસને થતાં તેમની ટીમ ઘટના સ્થળે આવી પહોંચી હતી અને લાશનો કબ્જો લઈ પોસ્ટમોર્ટમ (પી.એમ.) માટે સિવિલ હોસ્પિટલમાં લઈ જવામાં આવી હતી. ઘટનાની ફરિયાદ નોંધી ટ્રકનો કબ્જો લઈ સેલવાસ પોલીસે વધુ તપાસ હાથ ધરી છે.